Bolqarıstanın Energetika naziri Rosen Xristov və onun azərbaycanlı həmkarı Pərviz Şahbazov arasında telefon danışığı olub.
“İki sahil” Bolqarıstanın Energetika Nazirliyinə istinadla xəbər verir ki, telefon bağlantısı zamanı Yunanıstanla-Bolqarıstan bağlayıcı kəmərinin tamamlanma səviyyəsi və Azərbaycanın yeni qoşulma vasitəsilə qaz tədarük imkanları müzakirə edilib.
“Xristov həmkarından oktyabrın 1-dən bunun baş verməsinə (interkonnektorla qazın nəqlinin başlamasına – red.) hazır olduğuna dair zəmanət alıb. Onların söhbətində toxunulan digər mövzu isə razılaşdırılandan artıq əlavə qazın verilməsinin texniki imkanları olub”, - məlumatda qeyd olunub.
Qeyd edək ki, ICGB layihə şirkətinin (layihənin operatoru) icraçı direktoru Teodora Georieva öncə bildirmişdi ki, IGB bu ilin sentyabr-oktyabr aylarında fəaliyyətə başlayacaq.
IGB boru kəmərinin illik ötürmə gücü 3 mlrd. kubmetr olacaq, gələcəkdə bu göstərici 5 mlrd. kubmetrə çatdırıla bilər. Gözlənilir ki, artıq bu ilin sentyabr ayından başlayaraq, kəmər vasitəsilə Azərbaycan qazı Bolqarıstana nəql ediləcək.
Hazırda Azərbaycan qazı Bolqarıstana Yunanıstan ərazisi ilə alternativ birləşdirici infrastruktur vasitəsilə çatdırılır.