Süni intellekt çiplərinə artan tələbat nəticəsində “Nvidia” şirkətinin bazar dəyəri 3,92 trilyon dollara çataraq tarixi rekorda imza atıb. Beləliklə, şirkət “Apple”ın 2024-cü ilin sonunda əldə etdiyi 3,915 trilyon dollarlıq maksimum göstəricini də geridə qoyub.

Nvidia səhmlərində cüzi geriləmə olsa da, şirkət hələ də 3,89 trilyon dollarla yüksək səviyyədə qalır. Analitiklər bu artımı süni intellektə yönəlmiş böyük sərmayə dalğası ilə əlaqələndirirlər. Şirkətin son nəsil çipləri “Microsoft”, “Amazon”, “Meta” və “Tesla” kimi texnologiya nəhənglərinin məlumat mərkəzlərində geniş istifadə olunur.

LSEG-in məlumatına görə, “Nvidia”nın bazar dəyəri artıq Kanada, Meksika və Birləşmiş Krallıqda fəaliyyət göstərən bütün səhmdar şirkətlərin ümumi dəyərini üstələyib.

Dörd il əvvəl əsasən oyun qrafik kartları ilə tanınan “Nvidia”, bu gün süni intellekt sahəsində lider mövqeyə sahibdir. Son rübdə 44,1 milyard dollar gəlir əldə edən şirkətin illik gəlirinin 2026-cı ilə qədər 170 milyard dollara çatacağı proqnozlaşdırılır.

“Wall Street” analitiklərinə görə, “Nvidia” yaxın zamanda 4 trilyon dollarlıq həddi keçərək texnologiya dünyasında yeni bir mərhələyə qədəm qoya bilər.

Orxan Vahidoğlu, “İki sahil”