Rusiya Prezidenti Vladimir Putin müdafiə məqsədləri üçün istifadə olunmayan silah dərəcəli plutoniumun utilizasiyası ilə bağlı ABŞ ilə bağlanmış müqaviləni ləğv edən qanunu imzalayıb. Sənəd hüquqi informasiya portalında dərc edilib.

“İki sahil” xəbər verir ki, bu barədə "Kommersant" məlumat yayıb.

Tərəflər müqaviləni 2000-ci ildə imzalamış və 2011-ci ildə təsdiqləmişdilər. Müqaviləyə əsasən, ABŞ və Rusiya nüvə arsenallarının azaldılmasından sonra qalan 34 ton silah dərəcəli plutoniumun utilizasiyasına öhdəlik götürmüşdülər. Bu plutonium hərbi proqramlar üçün artıq hesab olunurdu.

Bu ilin 31 iyulunda hökumət Dövlət Dumasına müqavilədən çıxmaq üçün qanun layihəsi təqdim etdi. Göstərilən səbəblərdən biri ABŞ-ın Rusiyanın razılığı olmadan sərəncam prosedurunu dəyişdirmək niyyəti idi. 22 oktyabrda Federasiya Şurası müqavilənin ləğvini təsdiqləyib.

Bu arada, ABŞ hakimiyyəti "soyuq müharibə" dövründən qalma silah dərəcəli plutonium ehtiyatlarının bir hissəsini müəssisələrə təhvil verməyi planlaşdırır. Financial Times qəzetinin məlumatına görə, bu, Rusiyanın qlobal uran təchizatı bazarındakı dominant mövqeyini zəiflədəcək və məlumat mərkəzlərinin elektrik enerjisi xərclərini azaldacaq.