Bu gün Trans-Anadolu Qaz Boru Kəmərinin (TANAP) istifadəyə verilməsinin 8-ci ildönümüdür.

“İki sahil” xəbər verir ki, bu barədə Energetika Nazirliyinin yaydığı məlumatda bildirilib.

Qeyd olunub ki, 12 iyun 2018-ci il tarixində Türkiyədə TANAP layihəsinin birinci fazası istismara verilib. Azərbaycanın enerji strategiyasında mühüm yer tutan bu layihə vasitəsilə ölkənin təbii qaz ehtiyatları Türkiyə və Avropa bazarlarına çatdırılır.

Energetika Nazirliyinin məlumatına əsasən, TANAP kəməri ilə istismara verildiyi vaxtdan bu günədək Türkiyəyə 39,3 milyard kubmetr təbii qaz nəql olunub. Ümumilikdə isə boru kəməri vasitəsilə daşınan qazın həcmi 99 milyard kubmetrə yaxınlaşıb.

TANAP Cənub Qaz Dəhlizi layihəsinin əsas hissələrindən biri hesab olunur və Azərbaycanın enerji resurslarının beynəlxalq bazarlara çıxarılmasında strateji rol oynayır. Layihə həm regional enerji təhlükəsizliyinin möhkəmləndirilməsinə, həm də Avropanın enerji təchizatının şaxələndirilməsinə mühüm töhfə verir.

Qeyd edək ki, TANAP vasitəsilə nəql edilən qazın əsas mənbəyi Azərbaycanın Xəzər dənizində yerləşən Şahdəniz yatağıdır. Layihə regionun ən iri enerji infrastrukturu təşəbbüslərindən biri hesab edilir.