Yaponiyanın Kyuşu adasında baş verən 7,1 maqnitudalı güclü zəlzələ nəticəsində ölənlərin sayı 39 nəfərə çatıb.

“İki sahil” xəbər verir ki, bu barədə iyulun 28-də baş vermiş yeraltı təkanlardan ən çox zərər çəkən Kumamoto prefekturasının administrasiyası məlumat yayıb.

Hakimiyyət orqanlarının məlumatına görə, xəstəxanalarda ağır xəsarətlər alan 23 nəfər müalicə olunur.

Kumamotoda müvəqqəti yerləşdirmə məntəqələrində evlərinə qayıda bilməyən təxminən 6,6 min təxliyə edilmiş şəxs qalır. Belə ki, 18 mindən çox binaya ziyan dəyib. Dağıntıların təmizlənməsini güclü istilər çətinləşdirir - fəlakət bölgəsində havanın temperaturu gün ərzində 40 dərəcəyə çatır.

Prefekturada elektrik enerjisinin verilişi bərpa olunub ki, bu da yerləşdirmə məntəqələrində və yaşayış evlərində kondisionerlərin işləməsinə imkan verir. Bununla yanaşı, 36 mindən çox ev təsərrüfatı hələ də su təchizatından məhrumdur. Su xilasetmə işlərinə cəlb olunan hərbçilər tərəfindən avtosisternlərlə onlara çatdırılır.