Dövlət Turizm Agentliyi (DTA) və Azərbaycan Turizm Bürosu (ATB) tərəfindən təşkil olunan “Azərbaycan – Film destinasiyası” adlı vebinarda ölkəmizin film destinasiyası kimi potensialı haqda danışılıb. DTA-dan “İki sahil”ə verilən məlumata görə, vebinara 30-dan çox Hindistan film istehsalı şirkəti, turizm operatoru və tədbir təşkilatı ilə məşğul olan şirkətlər qatılıblar. Vebinarda Azərbaycanda unikal və araşdırılmamış çəkiliş yerləri barədə məlumat verilib.

İştirakçılar Azərbaycanda film çəkilişi sahəsindəki mövcud vəziyyət, kino layihəsi ilə birlikdə turizm təcrübəsinin artırılması, çəkiliş komandasına tövsiyə olunan turizm məhsulları və saytlar haqda məlumatlandırılıblar.

Vebinarda bildirilib ki, son illər ərzində bir çox beynəlxalq idman və mədəni-humanitar tədbirlərə ev sahibliyi edən Azərbaycanı film çəkilişləri üçün xüsusi edən əsas cəhətlər turizm infrastrukturu, kəşf olunmamış məkanların mövcudluğu, ölkənin unikal coğrafi mövqedə yerləşməsi, zəngin tarixi və mədəni abidələrə malik olması, həmçinin filmlərin çəkilməsi üçün büdcənin əlçatanlığıdır.

Qeyd edək ki, “Azərbaycan – Film destinasiyası” vebinarı Hindistan şirkətləri tərəfindən daxil olan çoxsaylı müraciətlər əsasında təşkil edilib.

Mahir Rəsuloğlu, “İki sahil”