Vətəndaş müraciətlərinə həssaslıqla baxılması, ortaya çıxan məsələlərin diqqətlə araşdırılıb həllinə nail olunması ilə bağlı ölkə başçısının qarşıya qoyduğu vəzifələr Lənkəran ŞİH rəhbərliyinin tərəfindən uğurla həyata keçirilir. İcra başçısının və aparatın rəhbər işçilərinin keçirdikləri şifahi qəbullarla yanaşı, bu günlərdə isə mövcud problemləri yerindəcə öyrənib həllini yola qoymaq məqsədilə rayonda səyyar qəbul-görüşləri təşkil olunur.
COVID-19 pandemiyasından sonra ilk səyyar qəbul-görüş rayonun Şıxəkəran kəndində baş tutdu. Şəhər İcra hakimiyyəti başçısı aparatının, hüquq-mühafizə orqanlarının, təhsil, səhiyyə, mədəniyyət idarələrinin və xidmət təşkilatlarının rəhbər işçilərinin iştirakı ilə keçən səyyar qəbul-görüşü sakinlər razılıqla qarşıladılar. Səyyar qəbulda sakinlərin tam sərbəst şəkildə söylədikləri arzu və təkliflər həssaslıqla dinlənildi, onların qaldırdığı məsələlər məsul şəxslərin iştirakı ilə yerindəcə araşdırılaraq bəzi tədbirlər görüldü, həlli vaxt tələb edən məsələlər isə nəzarətə götürülməklə aidiyyəti təşkilat rəhbərlərinə müvafiq tapşırıqlar verildi.
Səyyar qəbul-görüşündə icra başçısı Taleh Qaraşov əhali qarşında çıxış etdi: “Pandemiya dövrünün bütün çətinliyinə baxmayaraq cənab Prezidentin müdrik səyləri hesabına həyata keçirilən uğurlu daxili və xarici siyasətin nəticəsi olaraq xalqımızın ən ümdə arzuları gerçəkləşdi, hər bir Azərbaycan vətəndaşının xoş rifahına xidmət edən işlər görüldü. 44 günlük Vətən müharibəsində cənab Prezident İlham Əliyevin Ali Baş Komandanlığı ilə müzəffər Milli Ordumuz düşməni məhv edib Vətən torpaqlarını işğaldan azad etdi. Uğurlu siyası kursun bəhrəsidir ki, hazırda azad olunmuş ərazilərdə nəhəng quruculuq işləri başlanıb.”
Səyyar qəbulun təşkilindən razılıq edən kənd sakinlər Lənkəran rayonunun sosial-iqtisadi inkişafı sahəsində görülən işləri, xüsusilə yaşayış məntəqələrə kütləvi şəkildə “mavi” qazın çəkilişini, magistral yollara asfalt döşəməsini , elektrik enerjisinin fasiləsiz təşkilini, içməli su xəttinin çəkilişini və Şıxəkəran kənd tam orta məktəbi üçün ən müasir tələblərə cavab verən ikimərtəbəli yaraşıqlı məktəb binasının tikilib istifadəyə verməsini dilə gətirdilər, bütün bunlara görə ölkə Prezidenti və Birinci vitse-prezident Mehriban xanım Əliyevanın ünvanına minnətdarlıq dolu xoş sözlər söylədilər.
Zəfər Orucoğlu,
Azərbaycan Jurnalistlər Birliyinin üzvü
