Kürdəmir rayon  İcra Hakimiyyətinin və Yeni Azərbaycan Partiyası  Kürdəmir rayon təşkilatının birgə təşkilatçılığı ilə rayon təşkilatının qərargahında keçirilən tədbirdə rayonun icra başçısının müavini Vəsilə  Əsgərli, YAP Kürdəmir rayon təşkilatının sədri Ayaz Cəbrayılov, idarə, müəssisə və təşkilatların rəhbərləri, rayon təşkilatının ərazi partiya təşkilat sədrləri və rayon ictimaiyyəti nümayəndələri iştirak ediblər.

“İki sahil” xəbər verir ki, əvvəlcə Ulu Öndər Heydər Əliyevin və şəhidlərimizin ruhu  bir dəqiqəlik sükutla yad edilib.

Tədbiri giriş sözü ilə rayonun icra başçısının müavini Vəsilə  Əsgərli açaraq müstəqil Azərbaycanın Konstitusiyasının hazırlanmasında və qəbul olunmasında Ümumilli Lider Heydər Əliyevin xidmətlərindən və Azərbaycan xalqına verdiyi töhfələrdən danışdı.

Daha sonra digər çıxışçılar qeyd etdilər ki, 1995-ci il 12 noyabrda referendum yolu ilə dünyada toplanmış ən mütərəqqi təcrübə əsasında demokratik dəyərlərə malik müstəqil Azərbaycanın ilk Konstitusiyası qəbul edildi. Hüquqi, demokratik dövlət quruculuğu yolunda əldə olunmuş mühüm naliyyətlərdən biri kimi Konstitusiyamızın qəbul edilməsi çağdaş tariximizə qızıl həriflərlə həkk olundu.