“Rossiya 1”də yayımlanan “Ən vacibi haqqında” verilişinin yeni buraxılışında mütəxəssislər limonun müxtəlif xassələrindən -  qidaların qlisemik indeksini aşağı salmaqdan tutmuş həzmə kömək etməsindən və böyrək daşlarının əmələ gəlməsinin qarşısını almasından danışıblar.

Limon yeməklərə təravət və dad qatmaqla yanaşı, sağlamlığımıza və həzmimizə faydalı təsir göstərən heyrətamiz xüsusiyyətlərə malikdir.

Azaldılmış qlisemik indeks

Qlisemik indeks qidadakı karbohidratların qanda şəkərin səviyyəsini nə qədər tez qaldırdığını ölçür. Qanda şəkərin səviyyələrində “vəhşi” dalğalanmaların qarşısını almaq üçün balanslaşdırılmış qlisemik indeks vacibdir. Limon suyu karbohidratların mədədən qana udulmasını yavaşlatmağa kömək edə bilər ki, bu da piylənmə və 2-ci tip diabet kimi mümkün fəsadların qarşısını alır.

Bunun sayəsində limon və ya limon suyu istehlakı yaşa bağlı xəstəliklər, erkən qocalma riskini azaldır və ümumi sağlamlığı qoruyur.

Böyrək daşlarının əmələ gəlməsinin qarşısının alınması

Limonda olan sitratlar və limon turşusu böyrək daşlarının, xüsusilə urat daşlarının əmələ gəlməsinin qarşısını almağa kömək edə bilər. Sitratlar sidiyin turşu-əsas balansını qələviliyə doğru dəyişməyə kömək edir ki, bu da urolitiyazdan əziyyət çəkən insanlar üçün xüsusilə vacibdir.

Həzmə kömək

Limon turşusu mədə şirəsinin istehsalını stimullaşdırır və turşuluğunu artırır. Bunun sayəsində mədədəki fermentlər qidaları daha effektiv şəkildə parçalaya, daha yaxşı və daha sürətli həzmi təmin edə bilir. Limon turşusunun yaratdığı mədə hərəkətliliyinin yaxşılaşması yeməkdən sonrakı ağırlıq və narahatlığı azalda bilər, mədə turşusu az olan insanlara qidanı daha yaxşı həzm etməyə kömək edir.

Gündəlik pəhrizinizə limon əlavə etmək sağlamlığınızı yavaş-yavaş yaxşılaşdırmaq üçün asan və xoş bir yol ola bilər. Limonu əsas yeməklərə, salatlara, içkilərə və hətta çaya əlavə etmək olar. Qidada limonun müntəzəm istehlakı, çoxsaylı faydalı xüsusiyyətləri sayəsində sağlamlığın və bədənin ümumi gümrahlığının qorunmasına kömək edir.

Nubar Süleymanova, “İki sahil”