Rəqəmsal transformasiya özü ilə müəyyən risklər də gətirə bilər və bunları artıq görmək mümkündür.

“İki sahil” xəbər verir ki, bunu Birləşmiş Millətlər Təşkilatının İqtisadi və Sosial Məsələlər Departamentinin (UN DESA) Rəqəmsal Hökumət üzrə rəhbəri Vinçenzo Aquaro “29 İqlim Söhbəti: COP29-a gedən yol” Proqramı çərçivəsində Bakıda keçirilən “Kağızsız Hökumət: Rəqəmsallaşma və İnnovasiyanın Ətraf Mühitə Təsiri” adlı tədbirdə deyib.

"Dünyamız hələ də hibriddir və bu belə davam edəcək. Ona görə əsas məsələlərdən biri müxtəlif istiqamətlərdə aparılan rəqəmsal transformasiyanın insanlara yönəlik olmasıdır. Rəqəmsal transformasiyanın gətirdiyi risklər ilk növbədə data təhlükəsizliyi ilə bağlıdır. Bu, çox mühüm bir məsələdir. Çünki insanlar getdikcə kiber hücumlara daha da həssaslaşır. Ona görə də kibertəhlükəsizlik tədbirlərinin məhz zamanında həyata keçirilməsi mühüm əhəmiyyət kəsb edir. Digər risk isə sistem uğursuzluğudur. Burada söhbət data itkisindən gedir. Ona görə də biz mütləq sağlam bir şəkildə bərpa planları üzərində işləməliyik. Bu fəaliyyətlər paralel olaraq aparılmalıdır. Bu kontekstdə bizim nə etməli olduğumuz məsələsi ortaya çıxır. İlk növbədə müəyyən tarazlıq tapılmalıdır. Müasir texnologiyalardan istifadə bu gün geniş vüsət alıb. Cəmiyyətin müxtəlif yaş kateqoriyalarında bunu müşahidə edirik. Uşaqlar belə smartfonlardan istifadə edirlər. Bu risklər ciddi şəkildə təhlil edilməlidir", - V. Aquaro bildirib.

Digər bir riskin iş yerlərinin robotlarla əvəz olunması ilə bağlı olduğunu deyən BMT rəsmisi bu prosesin nəticə etibarı ilə çoxlu sayda iş yerlərinin itirilməsi təhlükəsinə gətirib çıxara biləcəyini vurğulayıb: "Ona görə də biz artıq indidən yeni fürsətlərdən yararlanmaqla yeni iş yerlərinin yaradılması üzərində fəal şəkildə işləməliyik. Çalışmalıyıq ki, artıq işləyən bir sistemi lüzümsüz şəkildə dəyişməyək".