İsrailin baş naziri Benyamin Netanyahu bazar günü hökumətin iclasında bildirib ki, ABŞ-da keçirilən seçkilərdən sonrakı son beş gün ərzində ABŞ-ın yeni seçilmiş prezidenti Donald Trampla üç dəfə danışıb.

“İki sahil” xəbər verir ki, bu barədə “The Jerusalem Post” məlumat yayıb.

Qeyd edilib ki, bunlar yaxşı və çox vacib söhbətlər olub.

Baş nazir vurğulayıb ki, bu müzakirələr İsrail və ABŞ arasında möhkəm müttəfiqliyi daha da gücləndirmək məqsədi daşıyır.

Netanyahu həmçinin qeyd edib ki, həm o, həm də ABŞ-ın yeni prezidenti İrandan gələn təhdidləri görürlər.

Netanyahu hökumətinə bazar günü həftəlik iclasında deyib: "Biz İran təhlükəsinin bütün komponentlərini və onun yaratdığı təhlükəni görürük".

Netanyahunun həm Co Bayden, həm də Trampla yaxın əlaqələri olsa da, onun Baydenlə münasibətləri siyasi fikir ayrılıqlarına görə gərgin kimi təsvir edilib. Bunun əksinə olaraq, onun və Trampın müxtəlif məsələlərə münasibətdə fikirləri daha çox üst-üstə düşür.

Məhərrəm Ağalaroğlu, “İki sahil”