ABŞ Müdafiə Nazirliyi dəniz piyadalarının Los-Ancelesdən geri çəkildiyini açıqlayıb. Onlar əvvəllər Donald Trampın immiqrasiya siyasətinə qarşı kütləvi etirazlar zamanı asayişi qorumaq üçün şəhərə göndərilmişdilər.

“İki sahil” xəbər verir ki,  bu barədə "Kommersant" məlumat yayıb.

Bildirilir ki, iyunun əvvəlində ABŞ prezidentinin əmri ilə 4000 Milli Qvardiyanın əsgəri və 700 dəniz piyadası şəhərə gətirilib. Dəniz piyadaları şəhərdəki federal qurumları, xüsusən də immiqrasiya siyasətinin sərtləşdirilməsinə və kütləvi deportasiyalara etiraz edən etirazçıların əsas hədəfləri arasında olan ABŞ İmmiqrasiya və Gömrük Mühafizə Xidmətinin obyektlərini mühafizə edirdi.

Kaliforniya ştatı və qubernator Gavin Nevsom məhkəmədə Milli Qvardiyanın və Dəniz Piyadalarının şəhərə yerləşdirilməsinin qanunsuz elan edilməsinə çalışdı, lakin buna nail ola bilmədi.

Pentaqonun sözçüsü Sean Parnell iyulun 22-də bildirib ki, hərbçilərin Los-Ancelesdəki mövcudluğu “açıq bir mesaj verdi: qanunsuzluğa yol verilməyəcək”.