ABŞ-Meksika sərhədindəki divar qara rəngə boyanacaq ki, günəşdə qızsın və beləliklə, qeyri-qanuni mühacirlərin onun üzərinə dırmaşmasının qarşısını alsın.

“İki sahil” xəbər verir ki, bu barədə ABŞ Daxili Təhlükəsizlik Naziri Kristi Noem bildirib.

Noem Nyu Meksikonu ziyarət edib. CBS xəbər verir ki, o, divarı rəngləmək üçün özü ilə rulon götürüb. Hadisə yerində olan Sərhəd Xidmətinin rəisi Mayk Benks boyanın həm də paslanmanın qarşısını almağa kömək edəcəyini bildirib.

"Bu, xüsusi olaraq prezidentin xahişi ilə edilib. O, anlayır ki, isti şəraitdə qara rəngə boyanmış divar qızır və insanların qalxması daha da çətinləşəcək. Ona görə də cənub sərhədindəki bütün divarı qara rəngə boyayacağıq", - Kristi Noem deyib.