Ümumdünya Səhiyyə Təşkilatı həyəcan təbili çalır: dünyada hər saat 100 nəfər tənhalığın təsirindən ölür. Niyə bu hiss XXI əsrin əsl kabusuna çevrilib? Bununla necə mübarizə aparmaq olar? Bu barədə rusiyalı mütəxəssis Aleksandr Myasnikov müəllifi olduğu sağlamlıq proqramında danışıb.

Yalnızlıq sadəcə, xoşagəlməz bir hiss deyil. Tədqiqatlar göstərir ki, o, fiziki sağlamlığa birbaşa təsir edir, insult, diabet, hipertoniya və Parkinson xəstəliyi riskini artırır. Doktor Aleksandr Myasnikovun qeyd etdiyi kimi, bu xəstəliklər daha çox təkliyin özü ilə deyil, onu müşayiət edən depressiya və stresslə əlaqələndirilir.

Xüsusilə təhlükəli olan odur ki, qadınlar orta hesabla ərlərindən 15 il daha çox yaşayır və onların çoxu ömrünün son illərini tək keçirir. Bu, problemi qocalmış cəmiyyət nümayəndələri üçün daha aktual edir. Paradoksal olsa da, amma sosial şəbəkələr və daimi ünsiyyət dövründə gənclər tənhalıqdan heç də yaşlılardan az əziyyət çəkmirlər. Myasnikovun fikrincə, müasir texnologiyalar ünsiyyət illüziyası yaradır, lakin insanlar arasında real təması təmin etmir.

Tənhalıq hissini necə dayandırmaq olar?

Məna tapın və “lazımlı” olun

Mütəxəssis rusiyalı könüllü Marianın hekayəsini misal göstərib. Boşandıqdan və qızı böyüdükdən sonra o, özünü lazımsız hiss etdi. Həlli başqalarına kömək etməkdən gördü: o, yetimlər üçün mentor oldu. Doktor Myasnikov ümumiləşdirib: "Əgər kiminsə sizə ehtiyacı varsa, siz artıq tək deyilsiniz".

Beyninizi yükləyin

Myasnikov deyir: "Beyniniz işlədikcə tənha ola bilməzsiniz". Oxumaq, öyrənmək, yaradıcılıq - bütün bunlar tənhalıqdan xilas edir.

Ev heyvanı alın

"Özünü tənha hesab edən hər bir insan sadəcə olaraq pişik və ya it almalıdır", - deyə həkim məsləhət görüb. Ev heyvanları təkcə emosional istilik vermir, həm də ehtiyac hissi verir: onları qidalandırmaq, gəzdirmək və baxmaq lazımdır.

Dinləməyi öyrənin

Yalnızlığın öhdəsindən gəlməyin açarı insanlarla real təmas qurmaq bacarığıdır. Mübahisə etmək və iddianızı sübut etmək əvəzinə, qarşıdakı insanı anlamağa çalışın və özünüzü onun yerinə qoyun.

Kitab oxuyun

"Kitabı olan insan necə tənha qala bilər?" həkim deyib. O, insanın daxili dünyasını tam doldura bilən “ayrı bir kainat” kimi Dostoyevski romanlarını misal gətirib.

Doktor Myasnikovun vurğuladığı kimi, tənhalıq tibbi problem deyil, böyük sosial problemdir və onu həblərlə deyil, həyat tərzini və düşüncəni dəyişdirməklə həll etmək lazımdır.

Nubar Süleymanova, “İki sahil”