Rusiya Teatr Sənəti İnstitutunun (GİTİS) Tədris Teatrında görkəmli bəstəkar, Azərbaycan peşəkar musiqi məktəbinin banisi, Şərqdə ilk operanın yaradıcısı Üzeyir Hacıbəylinin anadan olmasının 140 illiyinə həsr olunmuş tələbələr tərəfindən hazırlanan konsert keçirilib.
“İki sahil” xəbər verir ki, proqramda bəstəkarın məşhur “Firuzə”, “Arşın mal alan” və “Koroğlu” opera və operettalarından ariya və romanslar səsləndirilib, bu əsərlərdə Ü.Hacıbəyli Şərq lətafətini və xalq intonasiyalarını Avropa klassik ənənələri ilə birləşdirib.
Konsertdə iştirak edən Azərbaycanın Rusiyadakı səfiri Rəhman Mustafayev proqramın yüksək ifa səviyyəsini və emosional gücünü qeyd edib.
“Düzünü desəm, mən bu cür ifa keyfiyyətini və bu cür temperamenti, - sırf Azərbaycan ifa temperamenti görəcəyimi gözləmirdim. Üzeyir Hacıbəyli Azərbaycan peşəkar musiqi məktəbinin banisidir. Onun töhfəsi çox böyükdür: o, Şərq motivlərini Avropa musiqi ənənəsi ilə birləşdirməyə müvəffəq olub. Onu da qeyd etmək lazımdır ki, o, Avropa musiqi ənənələrini rus klassik musiqi məktəbinin təsiri ilə qavrayıb. Nəticədə bu sintezdən Azərbaycan klassik peşəkar musiqi məktəbi yaranıb”, - deyə diplomat vurğulayıb.
GİTİS-in Vokal sənəti kafedrasının müdir müavini, professor Nikolay Vasilyev Üzeyir Hacıbəyli yaradıcılığının qlobal musiqi mədəniyyəti üçün əhəmiyyətini qeyd edib.
“O, Vətənində opera dramaturgiyası ilə ciddi məşğul olan ilk bəstəkar olub. Bu, onun bəstəkar kimi əsl istedadından xəbər verir. Fakültəmiz bu yubileyin qeyd edilməsində məmnuniyyətlə iştirak edir və biz onun irsindən ən diqqətçəkən, ən gözəl parçaları seçməyə çalışdıq. Onlar həm rus, həm də Azərbaycan dillərində ifa olunub”, - deyə Vasilyev bildirib.
GİTİS-in Musiqili teatr fakültəsinin dekanı Timofey Sapolyov vurğulayıb ki, Üzeyir Hacıbəyli musiqisi tədris prosesində xüsusi yer tutur.
“Tədris prosesində yalnız ən yaxşı əsərlər yer almalıdır. Ona görə də tələbələrin repertuarına Motsart, Şostakoviç, Hacıbəyli əsərləri daxildir. Tədris dahi musiqi ilə aparılmalıdır. Bu, zövqü, forma hissini və dramaturgiya hisslərini inkişaf etdirməyə kömək edir. Mən əminəm ki, bu gün tamaşaçılar həqiqətən də həzz aldılar, çünki onlar əsl, səmimi musiqi üçün darıxıblar”, - deyə o qeyd edib.
Konsertdə GİTİS Musiqili teatr fakültəsinin tələbələri iştirak ediblər. Anastasiya Mişşenko bildirib ki, əsərlərin Azərbaycan dilində ifa edilməsi maraqlı və çətin təcrübə olub: “Musiqi çox gözəldir, temperament dərhal hiss edilir. Azərbaycan dilində ifa etmək çətin, lakin çox gözəl idi”.
Ruslan İbrahimov qeyd edib ki, tələbələr üçün bu, mühüm peşəkar təcrübədir: “Bu musiqinin özünəməxsus koloriti, harmoniyası və xarizması var. Bu ifa mənimlə qalacaq və gələcəkdə faydalı olacaq”.
Tədbirin quruluşçu rejissoru və aparıcısı Mariya Sladkovskaya vurğulayıb: “Bu konsert mənim üçün böyük xoşbəxtlikdir. Avropa formasının Azərbaycan koloriti ilə necə birləşdiyini eşitmək inanılmazdır. Biz bu konserti çoxdan planlaşdırırdıq və nəhayət, bu gün o, baş tutdu”.
