İran tərəfi Hörmüz boğazından gəmilərin keçidi üçün hər hansı bir rüsum tutmadığını ABŞ-a bildirib. ABŞ Prezidenti Donald Tramp bəyan edib ki, əgər bu məlumatın yalan olduğu üzə çıxarsa, Vaşinqton danışıqlar prosesini dərhal tərk edəcək.

“İki sahil” xəbər verir ki,  Prezident Tramp özünün "Truth Social" sosial şəbəkəsindəki hesabında ABŞ və İran arasındakı maliyyə razılaşmalarının detallarına da toxunub:

"ABŞ İrana heç bir pul köçürməyib və onun hesablarındakı vəsaitlərin bloklanmasını ləğv etməyib. Biz onların bizim tam nəzarətimizdə olan vəsaitlərinin bir hissəsini qarğıdalı, buğda, soya lobyası və digər məhsulların alınması üçün öz fermerlərimizə ayırmaq niyyətindəyik. İranda ərzağa ciddi ehtiyac var və biz bu məhsulları onlar üçün eksklüziv olaraq yalnız Birləşmiş Ştatlardan satın alacağıq."

Xatırladaq ki, iyunun 18-də ABŞ və İran arasında qarşılıqlı anlaşma memorandumu imzalanıb. Bu sənəd, xüsusilə Hörmüz boğazında gəmilərin sərbəst hərəkətinin bərpa olunmasını nəzərdə tutur. Bu razılaşmanın ardınca Oman beynəlxalq hüquqa və dəniz hüququna uyğun olaraq gəmilərin keçidi üçün boğazda müvəqqəti dəniz dəhlizinin yaradılmasını təsdiqləyib. ABŞ isə öz növbəsində İran limanlarının blokadasını 30 gün müddətinə dayandırmaq öhdəliyi götürüb. Bununla belə, Donald Tramp vurğulayıb ki, zərurət yaranacağı təqdirdə ABŞ məhdudiyyətləri yenidən qüvvəyə mindirə bilər.