Özbəkistan Prezidenti Şavkat Mirziyoyev kölgə iqtisadiyyatının azaldılması və bu sahədə prokuror nəzarətinin effektivliyinin artırılması tədbirləri ilə bağlı təqdimatı nəzərdən keçirib.
“İki sahil” rəsmi UZA agentliyinə istinadla xəbər verir ki, Prezidentin sözlərinə görə, son illərdə bu sahədə sistemli işlər görülüb. Xüsusilə, kölgə iqtisadiyyatı ilə mübarizə üzrə xüsusi və ərazi komissiyaları yaradılıb, vergi və gömrük orqanlarında risk təhlili və seqmentləşdirmə sistemləri tətbiq edilib, kölgə əməliyyatları üçün şərait yaradan bir sıra qanunvericilik boşluqları aradan qaldırılıb və vicdanlı sahibkarların təşviqi tədbirləri gücləndirilib. Bu tədbirlər nəticəsində müşahidə olunmayan iqtisadiyyatın payı son iki ildə 35 faizdən 23 faizə düşüb, büdcəyə əlavə 38 trilyon sum toplanıb, rəsmi olaraq işləyənlərin sayı 8,5 milyonu keçib və orta rəsmi əməkhaqqı 6,5 milyon suma yaxınlaşıb.
Özbəkistan lideri vurğulayıb ki, bu tədbirlərə baxmayaraq, kölgə iqtisadiyyatı əhəmiyyətli dərəcədə artıq olaraq qalır. Statistik hesablamalara görə, bu ilin birinci rübündə müşahidə olunmayan iqtisadiyyatın həcmi kənd təsərrüfatında 81,1 trilyon sum, ticarət və xidmət sahələrində 24,5 trilyon sum, tikintidə 23,9 trilyon sum, sənayedə isə 6,7 trilyon sum təşkil edib.
Prezident bildirib ki, kölgə iqtisadiyyatı büdcə gəlirlərinin azalması ilə yanaşı, ölkədə sağlam rəqabət mühitinə mənfi təsir göstərir, qeyri-rəsmi məşğulluq səbəbindən vətəndaşların sosial müdafiə səviyyəsinin aşağı düşməsinə səbəb olur, həmçinin əhalini (istehlakçıları) və müəssisələri qanunla təmin edilən dövlət dəstəyinin təminatlarından və mexanizmlərindən tam şəkildə yararlanmaq imkanından məhrum edir. Dövlət başçısı hökumətin qarşısına 2030-cu ilə qədər kölgə iqtisadiyyatının həcmini yarıya endirmək, rəsmi olaraq işləyənlərin sayını 14 milyon nəfərə çatdırmaq və nağdsız ödənişlərin payını 75 faizə çatdırmaq məqsədini qoyub.
Baş prokurorun Prezidentə təqdimatında Baş Prokurorluq tərəfindən hazırlanmış və bu məqsədlərə çatmaq üçün pilot rejimdə istifadəyə verilmiş “Kölgə iqtisadiyyatı xəritəsi” platformasının imkanları barədə məlumat verilib.
Platforma kölgə əməliyyatlarının risklərini müəyyən etməklə və məsul orqanların 22 əsas iqtisadi sektorda, 85 ərazidə, 14 bölgədə və 208 rayon və şəhərdə onların aradan qaldırılmasına nəzarət etməsini təmin etməklə büdcə gəlirlərinin artırılmasına və sağlam rəqabət mühitinin qorunmasına töhfə verəcək.
