Yeni Azərbaycan Partiyası (YAP) Masallı rayon təşkilatı “Partiya fəalları” layihəsi çərçivəsində Musaküçə ərazi partiya təşkilatında fəallarla görüş keçirib.
“İki sahil” xəbər verir ki, tədbir Ulu Öndər Heydər Əliyevin və ölkəmizin ərazi bütövlüyü uğrunda canlarından keçmiş şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
YAP Masallı rayon təşkilatının sədri Seyfəddin Əliyev toplantıdakı geniş nitqində Ulu Öndər Heydər Əliyevin çağdaş və suveren Azərbaycanın yaranması, dövlətçilik institutlarının qurulması həmçinin tərəqqisi naminə göstərdiyi misilsiz fəaliyyətə xüsusi diqqət çəkib. Natiq öz çıxışında qətiyyətlə bildirib ki, dahi rəhbərin uzaqgörən strateji xətti və zəngin siyasi irsi hazırda ölkə başçısı İlham Əliyev tərəfindən müasir dövrün qlobal tələblərinə uyğun olaraq yeni mərhələdə böyük uğurla davam etdirilir.
Təşkilat sədri həmçinin bəyan edib ki, dahi şəxsiyyətin həyatı boyu ən ümdə qayəsi, ən böyük amalı vətən torpaqlarının düşmən tapdağından birdəfəlik qurtarılması olub. Bu gün isə Ali Baş Komandanın sarsılmaz iradəsi və qəhrəman, rəşadətli hərbi hissələrimizin misilsiz şücaəti nəticəsində respublikamız öz tarixi ədalətini bərpa edərək suverenliyini bütövlükdə təmin edib. Əldə olunan bu möhtəşəm və parlaq qələbə dahi liderin müəyyənləşdirdiyi uzaqgörən ideyaların ən böyük tarixi təntənəsidir. Sonda sədr vurğulayıb ki, partiyanın hər bir fəal üzvü yaranmış bu yeni reallıqların, qazanılan uğurların xalq arasında geniş auditoriyaya çatdırılmasında və təbliğində hər zaman ön sıralarda addımlamalı, fəal mövqe nümayiş etdirməlidir.
Sonra Musaküçə ərazi partiya təşkilatının sədri Surac Şahverdiyev, partiya fəallarından Əliməmməd Dadaşov, Azad Şahverdiyev və başqaları çıxış edərək Ulu Öndər Heydər Əliyevin təməlini qoyduğu və Dövlət Başçısı, Prezident İlham Əliyevin qətiyyətlə reallaşdırdığı strateji xətt sayəsində respublikamızın möhtəşəm tərəqqi mərhələsi qət etdiyini diqqətə çatdırıblar. Bununla yanaşı, natiqlər öz çıxışlarında xüsusi olaraq bəyan ediblər ki, Vətən müharibəsində əldə olunan tarixi və möhtəşəm qələbə, ilk növbədə, Ali Baş Komandan İlham Əliyevin sarsılmaz iradəsinin, uzaqgörən hərbi-siyasi strategiyasının, rəşadətli silahlı qüvvələrimizin döyüş meydanındakı misilsiz qəhrəmanlığının və sarsılmaz xalq-iqtidar birliyinin ən bariz, ən parlaq təzahürüdür.
