ABŞ-ın Daxili Gəlirlər Xidmətinin (IRS) icraçı direktoru və İctimai Təminat Administrasiyasının (SSA) rəhbəri Frenk Bisinyano on ildən çox əvvəl "JPMorgan Chase" bankında əməliyyat üzrə həm-direktor vəzifəsində çalışarkən həmkarlarına qarşı gizli izləmə təşkil edib.

“İki sahil” xəbər verir ki,  bu barədə "The Wall Street Journal" (WSJ) nəşri məsələdən xəbərdar olan mənbələrə istinadla məlumat verib.

Nəşrin həmsöhbətlərinin sözlərinə görə, Bisinyano tutduğu yüksək vəzifədən və səlahiyyətlərindən istifadə edərək rəhbər heyətin daxili yazışmalarına çıxış əldə edib. Zərərçəkənlər arasında hazırda "Wells Fargo" bankının rəhbəri olan Çarli Şarf kimi yüksəksəviyyəli top-menecerlər də var.

WSJ-nin mənbələri bildirir ki, Frenk Bisinyano daxili təhlükəsizlik şöbəsi üzərindəki nəzarətindən istifadə edərək kiber-izləmə həyata keçirib. O, işçilərin klaviaturada basdığı düymələri qeydə alan xüsusi proqram təminatı vasitəsilə əməkdaşların rəqəmsal fəaliyyətini izləyib və bu yolla məxfi sənədlərə qanunsuz çıxış əldə edib. Mənbələrin iddiasına görə, Bisinyano bu gizli izləmə fəaliyyətini şəxsi nüfuzunu və hakimiyyətini möhkəmləndirmək, rəqiblərini sıradan çıxarmaq və bankın məxfi məlumatlarına sahib olmaq üçün həyata keçirib.

İddialara görə, 2013-cü ildə onun bankdan ayrılmasından sonra "JPMorgan" hüquqşünasları Bisinyanonun rəqəmsal izlərini və qanunsuz əməliyyatlarını aşkar ediblər. Bu hadisə bank daxilində məxfi məlumatlara giriş qaydalarının kəskin şəkildə sərtləşdirilməsinə səbəb olub.