“Terrorsuz Türkiyə” təşəbbüsü çərçivəsində hazırlanmış “Milli həmrəyliyin və sosial inteqrasiyanın gücləndirilməsi haqqında” qanun layihəsi avqustun 5-də Türkiyə Böyük Millət Məclisinin (TBMM) 28-ci çağırış üzrə 592 deputatından 360-nın imzası ilə parlamentin gündəliyinə daxil edilib.

“İki sahil” xəbər verir ki, 12 maddədən ibarət olan sənəd parlamentdə təmsil olunan əsas siyasi qüvvələrin, o cümlədən hakim Ədalət və İnkişaf Partiyasının (AK Parti) əksəriyyəti tərəfindən dəstəklənib.

Qanunvericilik təşəbbüsünün məqsədi zorakılıq yolundan imtina etmiş cinayətkar təşkilat üzvlərinin cəmiyyətə yenidən inteqrasiyasını təmin etməkdir.

Sənədə əsasən, terror təşkilatının tərkibində törətdikləri qanunazidd əməllərə görə 15 ilədək azadlıqdan məhrumetmə cəzası nəzərdə tutulan şəxslər barəsində cəzanın icrası 5 il müddətinə təxirə salına biləcək. Əməllərinə görə 15 ildən artıq və ya ömürlük azadlıqdan məhrumetmə cəzası nəzərdə tutulan şəxslər üçün isə bu müddət 10 il olacaq.

Qanunun nəzərdə tutduğu imkanlardan yararlanmaq istəyən şəxslər altı ay ərzində müraciət edə biləcəklər. Bununla yanaşı, cəzanın icrasının təxirə salınması iddia müddətinin başa çatmasına görə cinayət məsuliyyətindən azad edilmək üçün əsas hesab olunmayacaq.

PKK-nın rəhbərləri, qəsdən adam öldürmə cinayəti törətmiş terrorçular, habelə 2005-ci il iyunun 1-dək ömürlük azadlıqdan məhrumetmə cəzasını nəzərdə tutan xüsusilə ağır cinayətlər törətməkdə təqsirləndirilən şəxslər çərçivə qanununun tələblərindən yararlana bilməyəcəklər.

Prosesə nəzarəti Türkiyənin Ədliyyə, Xarici İşlər və Daxili İşlər nazirlikləri, Prezident Administrasiyasının Katibliyi, Milli Kəşfiyyat Təşkilatı və Milli Təhlükəsizlik Şurasının Katibliyinin birgə iştirakı ilə formalaşdırılacaq xüsusi qurum həyata keçirəcək.

Qanunvericilik təşəbbüsü avqustun 7-nə təyin olunmuş TBMM-in Ədliyyə Komitəsinin iclasının gündəliyinə daxil edilib.