Bəhreyn, İsrail, Mərakeş, Birləşmiş Ərəb Əmirlikləri (BƏƏ) və ABŞ-ın nümayəndələri Nyu-Yorkda yəhudi dövləti ilə ərəb ölkələri arasında münasibətlərin yaxşılaşdırılmasına yönəlmiş İbrahim sazişləri formatında son üç ildən artıq müddətdə ilk görüşü keçiriblər.
“İki sahil” xəbər verir ki, bu barədə CBS telekanalı məlumat yayıb.
Bu formatda əvvəlki işçi görüşü 2023-cü ilin yanvarında Əbu-Dabidə baş tutmuşdu. 2023-cü il oktyabrın 7-də baş verən terror aktlarından və İsrailin Qəzza zolağında irimiqyaslı hərbi əməliyyatlara başlamasından sonra ölkələr İbrahim sazişləri üzrə görüşlərin keçirilməsini dayandırmışdılar. Telekanalın mənbələrindən birinin qeyd etdiyi kimi, ABŞ prezidenti Donald Trampın administrasiyası bu formatın işinin bərpa edilməsinə prioritet əhəmiyyət verir. CBS-in məlumatına görə, dialoq zamanı münasibətlərin daha da nizamlanması və tərəfdaşlığın inkişafı işində müəyyən irəliləyiş əldə etmək mümkün olub.
Görüşdə ilk dəfə olaraq Qazaxıstan nümayəndələri də iştirak ediblər; rəhbərliyi daha əvvəl bu razılaşmalara qoşulmaq istədiyini də bəyan etmişdi.
İbrahim sazişləri ABŞ-ın vasitəçiliyi ilə İsrail və bir sıra ərəb ölkələri tərəfindən əldə olunub. 2020-ci ildə Bəhreyn, Mərakeş və BƏƏ İsraillə münasibətləri normallaşdırıblar. 2021-ci ildə Sudan yəhudi dövləti ilə diplomatik əlaqələrin qurulduğunu elan edib. Ərəb ölkələrinə gəldikdə, bu sazişlər bağlanmazdan əvvəl İsrailin yalnız Misir (1979) və İordaniya (1994) ilə diplomatik əlaqələri var idi.
