Lənkəran şəhər  Mədəniyyət Mərkəzinin növbəti tədbiri  Vətən müharibəsinin şəhidi  Tural   Hümmətovun  doğum gününə həsr olunmuşdu. Lənkəran Regional Mədəniyyət İdarəsinin  təşkilatçılığı  sayəsində baş tutan  tədbirin qonaqları  idarənin rəisi Şahin Şahbazov və idarənin tabeliyində fəaliyyət göstərən müəssisələrin əməkdaşları,  Mədəniyyət Mərkəzinin direktor əvəzi Habil Əliyev, şəhidin ailə üzvləri, yaxın dostları,  müharibə iştirakçıları , Azərbaycan Vətən Müharibəsi Veteranları İctimai Birliyinin Lənkəran Rayon Şöbəsinin sədr müavini Saleh Dostiyev, Lənkəran Şəhər İcra Hakimiyyətinin Osakücə kənd ərazi dairəsi üzrə icra nümayəndəsi Hidayət Mirzəyev və adı çəkilən kəndin bələdiyyə sədri Həqiqət Cavadova idilər.

Öncə tədbir iştirakçıları Mədəniyyət Mərkəzinin foyesində şəhidin xatirəsinə ucaldılan abidəsini ziyarət edib,  önünə gül-çiçək  dəstələri qoydular. Mədəniyyət Mərkəzinin akt zalına toplaşan tədbir iştirakçıları  Vətənimizin ərazi bütövlüyü uğrunda  öz canından keçib şəhid olan oğlanların  əziz xatirəsini bir dəqiqəlik sükutla andılar.

Lənkəran Regional Mədəniyyət İdarəsinin rəisi Şahin Şahbazov  tədbiri açıb dedi - İkinci Qarabağ müharibəsində igid  Vətən övladları bir daha göstərdilər  ki,  qəhrəmanlıq xalqımızın qanına hopmuş ali bir hissdir. Zaman-zaman igid oğullarımız döyüş meydanlarında əsl qəhrəmanlıq  nümayiş etmiş və xalqımızı məruz qaldığı bəlalardan qurtarıb,  doğma torpaqları  yadelli qəsbkarların basqınından qətiyyətlə qoruyaraq  millətin tükənməz sərvətlərini , tarixi abidələrini, yurd-yuvalarını düşmən talanından azad etmişlər.

Daha sonra o, Prezident İlham Əliyev tərəfindən şəhid ailələrinə göstərilən diqqət və qayğıdan geniş danışmaqla çıxışına yekun vurdu. 

Tədbirdə Azərbaycan Respublikası Mədəniyyət Nazirliyinin təşəbbüsü ilə  çəkilmiş  Turalın  qəhrəmanlığını  vəsf edən  “Səhnədən səngərə" adlı video-çarx nümayiş olundu, eləcə Osakücə kənd   Yaradıcılıq evinin və  M. Kələntərli adına Lənkəran şəhər Sənətkarlıq klubunun qiraət dərnəyinin üzvləri tərəfindən  vətənpərvərlik  mövzusunda şerlər səsləndi.

Zəfər Orucoğlu,
Azərbaycan Jurnalistlər Birliyinin üzvü