02 iyul 2022-ci il tarixdə Yeni Azərbaycan Partiyası Kürdəmir rayon təşkilatının sədri Ayaz Cəbrayılov, Kürdəmir rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Mirmahmud Mahmudov, Şəhid anası Simuzər Bağıyeva, Qacar Sadıqov adına Mollakənd kənd tam orta məktəbinin direktoru Akif İbrahimov,YAP rayon təşkilatının əməkdaşları, kənd sakinləri, şəhidlərin valideynləri Vətən müharibəsində torpaqlarımızın azadlığı uğrunda qəhrəmancasına Şəhid olmuş Eminov Nurlan Pərviz oğlunun və Eyyubov Tural Yadulla oğlunun doğum günləri ilə əlaqədar şəhidlərin rayonunun Ərəbqubalı kəndində və Mollakənd kəndində yerləşən məzarlarını ziyarət edərək, qəbrləri üzərinə gül dəstələri düzüb və xatirələrini böyük ehtiramla yad ediblər.
“İki sahil” xəbər verir ki, daha sonra tədbir iştirakçıları şəhidlərin evlərinə gedərək, ailə üzvləri ilə görüşüb, onların qayğı və problemləri ilə maraqlanaraq maddi və mənəvi dəstək göstəriblər.
YAP Kürdəmir rayon təşkilatının sədri Ayaz Cəbrayılov bildirib ki, şəhidlərimizin ruhu bizim üçün çox əzizdir: “Parlaq qələbəni, şanlı zəfəri bizə yaşadan şəhidlərimizin ruhu qarşısında baş əyirik, şəhid analarına dərin minnətdarlığımızı bildiririk. 44 günlük Vətən müharibəsi və tarixi qələbəmiz Azərbaycan xalqının nəyə qadir olduğunu göstərdi. Xalqımızın birliyi, Ali Baş Komandanımızın qətiyyəti, Ordumuzun gücü, əsgər və zabitlərimizin peşəkarlığı, qəhrəmanlığı parlaq zəfərimizin qazanılması ilə nəticələndi”.
Tədbirdə çıxış edənlər Şəhid Eminov Nurlan Pərviz oğlunun və Şəhid Eyyubov Tural Yadulla oğlunun keçdikləri şərəfli həyat yollarından və döyüşlərdə göstərdikləri igidliklərindən söhbət açıblar. Şəhidlərimizin ailə üzvləri şəhid ailələrinə göstərilən diqqət və qayğıdan razılıqlarını ifadə edərək, buna görə Prezident, Ali Baş Komandan İlham Əliyevə, Birinci vitse-prezident Mehriban xanım Əliyevaya minnətdarlıqlarını ifadə ediblər.
Xatırladaq ki, Azərbaycanın ərazi bütövlüyünün təmin edilməsi uğrunda döyüş əməliyyatlarına qatılaraq hərbi hissə qarşısında qoyulmuş tapşırıqların icrası zamanı vəzifə borclarını şərəflə yerinə yetridikləri, şəxsi igidlik və şücaət nümayiş etdirdikləri üçün Azərbaycan Prezidenti İlham Əliyevin müvafiq Sərəncamları ilə Şəhid Nurlan Eminov “Vətən uğurunda”, “İgidliyə görə” və “Kəlbəcərin azad olunmasına görə” medalları ilə, Şəhid Tural Eyyubov isə "Vətən uğrunda" , "Xocavəndin azad olunmasına görə", "Füzulinin azad olunmasına görə" və "Şuşanın azad olunmasına görə" medalları ilə təltif ediliblər.
