2023-cü ilin yanvar-aprel ayları ərzində Cənubi Qafqaz (Bakı-Tbilisi-Ərzurum) boru kəməri ilə 2022-ci ilin analoji dövründəki 6,783 milyard kubmetr ilə müqayisədə 7,346 milyard kubmetrdən artıq qaz nəql olunub.

"İki sahil" bu barədə cümə axşamı Azərbaycan Respublikasının Dövlət Statistika komitəsinə istinadən xəbər verir.

Beləliklə, Bakı-Tbilisi-Ərzurum boru kəməri ilə qaz tədarükünün həcmi ötən ilin analoji dövrü ilə müqayisədə 8,3 faiz artıb. Onun payına 2023-cü ilin yanvar-aprel aylarında Azərbaycanın magistral qaz kəmərləri ilə nəql olunan qazın 49,9 faizi düşüb, ötən ilin analoji dövründə isə bu göstərici 48,7 faiz olub.

2023-cü ilin yanvar-aprel ayları ərzində Azərbaycanın magistral qaz kəmərləri ilə təqribən 14,712 milyard kubmetr qaz nəql olunub ki, bu da ötən ildəkindən 5,7 faiz çoxdur.

Qeyd edək ki, CQBK boru kəməri 2006-cı ilin sonlarında istismara verilib və Azərbaycan, Gürcüstan və Türkiyəyə Şahdəniz qazını çatdırır, Cənubi Qafqaz Boru Kəmərinin genişləndirilməsi (CQBKG) sistemi isə kommersiya qaz həcmlərinin Türkiyəyə çatdırılmasına 2018-ci ilin iyun ayında, Avropaya isə 2020-ci ilin dekabr ayında başlayıb.

Cənubi Qafqaz Boru Kəməri şirkətinin (CQBKş) səhmdarları bunlardır: bp (operator – 29,99%), Cənub Qaz Dəhlizi (21,02%), LUKOYL (19,99%), TPAO (19,00%) və NİKO (10,0%).