Lerik rayonunda Kənd Təsərrüfatı Nazirliyinin tabeliyində olan “Aqroservis” ASC-nin İdarə Heyətinin sədri Elmin Rəhmanovun iştirakı ilə fermer və sahibkarlarla görüş keçirilib.
“İki sahil” xəbər verir ki, görüşdə taxıl biçininin itkisiz və mütəşəkkil həyata keçirilməsi, biçin zamanı qarşıya çıxa biləcək problemlər və onların həllinə dair məsələlər müzakirə edilib, fermerlərin problemləri dinlənilib.
E.Rəhmanov fermerlərə biçin qaydalarını izah edərək, üzərlərinə düşən vəzifə və məsuliyyət barədə məlumat verib. Bildirib ki, hər il olduğu kimi, bu il də kənd və qəsəbələrdə biçin prosesi növbəlilik əsasında həyata keçirilib. Növbəliliyin yaradılmasına icra nümayəndəlikləri və bələdiyyələr tərəfindən dəstək göstərilib, biçinə və növbəlilik sisteminə nəzarətin təmin olunması isə Dövlət Aqrar İnkişaf Mərkəzləri (DAİM) tərəfindən həyata keçirilib.
O, həmçinin diqqətə çatıdırb ki, biçin zamanı dislokasiya planına nəzarət edilməsi üçün kombaynlar GPS nəzarət sistemi ilə təchiz edilib. Bu innovativ nəzarət sistemi biçin zamanı operativliyin təmin edilməsi, biçin prosesinə və dislokasiya planına nəzarət edilməsi və şəffaf idarəetmə mexanizminin qurulmasına imkan yaradır.
Görüşdə Lerik rayon icra hakimiyyətinin başçısı Əkbər Abbasov, Lerik Dövlət Aqrar İnkişaf Mərkəzinin nümayəndələri iştirak ediblər.
Qeyd edək ki, hazırda ölkə üzrə biçin prosesi davam edir. Biçin Lerikin dağ kəndlərində iyul ayının sonuna kimi aparılacaq. Rayonda iyul ayının 20-dən etibarən biçinə başlanılıb, artıq 60% ərazidə biçin yekunlaşıb.
Lerik rayonunda bu il 3800 hektar ərazidə əkin aparılıb. Hazırda rayonda 11 kombayn biçin işləri aparır. Onlardan 5 ədədi yeni innovativ "New Holland 5.90 HillSide" dağ kombaynlarıdır.
