Lənkəran Dövlət Universitetində 250 yerlik yataqxana binasında son tamamlanma işləri bir an belə səngimir. Universitetdə təhsil alan oğlan tələbələri üçün nəzərdə tutmuş bu yataqxana binası 2023/2024-cü tədris ilində tam istifadəyə veriləcək.
“İki sahil” xəbər verir ki, yaraşıqlı görkəmi ilə uzaqdan belə diqqəti özünə çəkən yeni yataqxana binası universitetin II saylı korpusunda ucaldılıb. 5 mərtəbə, 100 otaqdan ibarət binada oğlan tələbələrin rahatlığı üçün hər cür şərait yaradılıb. Belə ki, yataqxananın işıqlı, geniş otaqları zəruri məişət avadanlıqları, fasiləsiz internetlə təmin olunub. İdman, kitabxana və oxu zalı, informatika otağı, istirahət guşəsi müasir tələblərə uyğun düzəldilib. Onu da bildirək ki, otaqlar 2 və 3 nəfərlik nəzərdə tutulub və çarpayı, soyuducu, sanitar qovşağı, fasiləsiz su, mətbəx ləvazimatları ilə təchiz edilib. Həmçinin yataqxana binasında video müşahidə, yanğın əleyhinə siqnalizasiya sistemləri qurulub, internet və telefon xətləri çəkilib.
Oğlanlar üçün nəzərdə tutulmuş yeni tələbə yataqxanasını ali təhsil ocağının 30 illik tarixinin ürək açan nailiyyəti hesab edən Lənkəran Dövlət Universitetinin rektoru, professor Natiq İbrahimov onu da dedi ki, tələbələrin sayına görə bundan sonra bu iş davamlı olacaqdır. Hazırda universitetimizdə paytaxt Bakı daxil olmaqla, ölkənin bütün regionlardan 5400 tələbə təhsil alır və daha 2000 nəfərin yeni tədris ilində ali təhsil ocağına qəbulu gözlənilir. Bunu nəzərə alaraq yeni yataqxanaların tikintisi vacib əhəmiyyət daşıyır.
2019-cu ildə universitetdə qızlar üçün 160 yerlik tələbə yataqxanası tikilərək istifadəyə verilmişdi.
Zəfər Orucoğlu,
Azərbaycan Jurnalistlər Birliyinin üzvü
