Azərbaycanın müdafiə naziri Çinin “CETC International” şirkətində olub

Çin Xalq Respublikasına rəsmi səfəri çərçivəsində Azərbaycan Respublikasının müdafiə naziri, general-polkovnik Zakir Həsənov aprelin 28-də bu ölkənin müdafiə sənayesi sahəsində yüksək texnologiyalı məhsullar istehsal edən “CETC International” şirkətinin fəaliyyəti ilə tanış olub.

Müəssisənin rəhbərliyi ilə görüşdə Azərbaycan ilə Çin arasında hərbi-texniki əməkdaşlıq məsələləri müzakirə edilib.

Sonra müdafiə naziri şirkətin istehsal etdiyi hərbi təyinatlı döyüş vasitələrinə baxıb.

Bildirilib ki, şirkət əsasən elektron komponentlərin və avadanlığın istehsalı ilə məşhurdur. Dünyanın 100-dən çox ölkəsi ilə əməkdaşlıq edən “CETC International” şirkəti hazır məhsullarının çeşidinin və keyfiyyətinin səviyyəsi ilə seçilir.