44 günlük haqq savaşımızda sinəsini Vətəninə sipər edib ölümsüzlük qazanan qəhrəmanlardan bir də şəhid Afərin Müqəddəs oğlu Qulamzadədir. Lənkəranın Mamusta kəndində dünyaya göz açan bu Vətən sevdalısı şərəfli ömrünün 25 ilinə qədəm qoydu. Afərin cismən aramızdan getsə də, mənən milyonların ürəyində yaşayır. Lənkəran şəhər Heydər Əliyev Mərkəzinin təşkilatçılığı ilə "Tariximiz qürurumuzdur" layihəsi çərçivəsində Lənkəran şəhər Mədəniyyət Mərkəzində şəhidin doğum günü münasibətilə tədbir keçirildi.
Lənkəran Şəhər İcra Hakimiyyəti başçısının müavini - İctimai-siyasi və humanitar məsələlər şöbəsinin müdiri Ülviyyə Əliyevanın və digər rəsmilərin, şəhid ailə üzvlərinin, müharibə əlillərin, təhsil aldığı M. Fərzullayev adına Mamusta kənd tam orta məktəbin müəllim və şagirdlərin, rayon ictimaiyyətinin nümayəndələrin qatıldığı tədbirdə əvvəlcə şəhidin şəxsi əşya və fotolarından ibarət sərgiyə baxış oldu.
Tədbir Azərbaycan Respublikasının Dövlət Himninin səslənməsi, ulu öndər Heydər Əliyevin və Vətən yolunda canını fəda edən şəhidlərin xatirəsinin bir dəqiqəlik sükutla anılmaq ilə başladı.
Tarix yazan qəhrəmanın həyat yolunu özündə əks etdirən video çarx izlənildi, Mərkəzin direktoru Reyhanə Sadıxova Azərbaycan Ordusunun zəfər yürüşündən, İkinci Qarabağ savaşında göstərilən igidlik və rəşadətdən, eləcə də şanlı qələbəmizin tarixi əhəmiyyətindən söz açdı, şəhidin ailə üzvlərinə Heydər Əliyev Mərkəzinin rəsm studiyasında yağlı boya ilə çəkilmiş Afərin Qulamzadənin portretini təqdim etdi.
Çıxışında Lənkəran Şəhər İcra Hakimiyyəti başçısının müavini - İctimai-siyasi və humanitar məsələlər şöbəsinin müdiri Ü. Əliyeva dedi:- Ölkə Prezidenti, Ali Baş Komandan İlham Əliyevin rəhbərliyi altında qüdrətli Azərbaycan Ordusunun iradəsi və gücü sayəsində 30 il düşmən əsarətində qalan torpaqlarımız yağı düşməndən geri alındı, Vətənimizin bütövlüyü təmin edildi. Bu yolda can qoyan, qan tökən şəhidlərimiz heç zaman unudulmaz, onların əziz xatirəsi əbədi qəlbimizdə yaşamaqla gələn nəsillərə də örnək göstəriləcək.
Məktəblilər Vətən və şəhidlərə haqqında milli ruhda şerlər söylədilər. Mərhum ifaçı, söz ustadı Elnur Valehin şəhid Afərinin əziz xatirəsinə həsr etdiyi klip, tanınmış ifaçıların vətənpərvərlik mövzusunda mahnıları dinlənildi.
Məlum olsun ki, Vətən müharibəsində son nəfəsinə qədər qəhrəmancasına yağıya qarşı vuruşaraq şəhidlik zirvəsinə ucalan igid əsgər ölümündən sonra dövlət tərəfindən “Vətənə xidmətə görə” ordeninə, “Vətən uğrunda” və digər medallara layiq görülüb. Onun əziz xatirəsinə ehtiram əlaməti olaraq bulaq, büst, xatirə lövhəsi yaradılıb.
Zəfər Orucoğlu,
Azərbaycan Jurnalistlər Birliyinin üzvü
