Azərbaycan Respublikasının Prezidenti İlham Əliyevin 2025-ci il aprelin 25-də CGTN telekanalına verdiyi müsahibəsində vurğuladığı əsas məqamlardan biri də ölkəmizin Çin Xalq Respublikasının Sədri Si Cinpinin beynəlxalq təşəbbüslərinə aktiv şəkildə qoşulması oldu. Bu təşəbbüslər – Qlobal İnkişaf Təşəbbüsü, Qlobal Təhlükəsizlik Təşəbbüsü və Qlobal Sivilizasiyalar Təşəbbüsü – dünya miqyasında sülhə, əməkdaşlığa və qarşılıqlı anlaşmaya xidmət edir.

Prezident İlham Əliyev bildirib ki, Azərbaycan bu təşəbbüsləri səmimi və strateji baxımdan dəyərli hesab edir, çünki onlar bütün dövlətlərin suverenliyinə, bərabər hüquqlara və inkişaf haqqına hörmət prinsipinə əsaslanır. Azərbaycan, bu dəyərləri öz xarici siyasətində daim ön planda saxlayan ölkə olaraq, Çinlə bu istiqamətlərdə əməkdaşlığı dərinləşdirməyə hazırdır.

Xüsusilə, Qlobal İnkişaf Təşəbbüsü çərçivəsində Azərbaycan “Bir Kəmər, Bir Yol” layihəsində fəal iştirak etməklə regional nəqliyyat və enerji infrastrukturunun inkişafına töhfə verir. Bu, yalnız iqtisadi layihə deyil, həm də xalqları birləşdirən, dialoq və sülhə zəmin yaradan bir təşəbbüsdür.

Təhlükəsizlik sahəsində də Prezident İlham Əliyev qeyd edib ki, Azərbaycan regional və qlobal sabitliyin qorunmasında maraqlıdır. Bu baxımdan, Qlobal Təhlükəsizlik Təşəbbüsü çərçivəsində əməkdaşlıq, birgə təhlükəsizlik anlayışının formalaşmasına imkan yaradır və Azərbaycanın balanslaşdırılmış xarici siyasəti ilə uzlaşır.

Eyni zamanda, Qlobal Sivilizasiyalar Təşəbbüsü Azərbaycanın multikulturalizm və dinlərarası dialoq sahəsindəki uğurlu təcrübəsi ilə üst-üstə düşür. Azərbaycan sivilizasiyalararası dialoqun təşviqi sahəsində beynəlxalq konfranslara ev sahibliyi etmiş və bu təşəbbüsün fəal iştirakçısına çevrilmişdir.

Beləliklə, Azərbaycanın bu təşəbbüslərə qoşulması, yalnız Çinlə münasibətlərin möhkəmlənməsi deyil, eyni zamanda ölkəmizin qlobal miqyasda sülh, əməkdaşlıq və inkişaf istiqamətində oynadığı rolu daha da gücləndirir.

Elmir Qurbanov,
YAP Xətai rayon təşkilatının ərazi partiya təşkilat sədrinin müavini