Avropa Ukraynanı silahla dəstəkləmək üçün səylərini artırır, lakin Fransa Amerika sistemlərinin alınması təşəbbüsünə qoşulmamaq qərarına gəlib.

“İki sahil” xəbər verir ki, bu barədə “Politico” məlumat yayıb.

Almaniyanın təşəbbüsü ilə təklif edilən yeni plan Avropa ölkələrinin Ukrayna Silahlı Qüvvələri üçün Amerika silahlarının alınmasını nəzərdə tutur.

Nəşrin yazdığına görə, bu, prezident Donald Trampa siyasi örtük verir və ona ABŞ-dakı MAGA hərəkatının təcridçi qanadı ilə birbaşa qarşıdurmadan qaçmağa imkan verir.

Rəsmi olaraq yeni təşəbbüs NATO-nun baş katibi Mark Rutte tərəfindən müsbət qarşılanıb. O, Trampa “güclü liderliyinə” görə təşəkkür edib, lakin diplomatiyanın pərdə arxasında başqa bir həqiqət eşidilir: əsas razılaşmalar Vaşinqtonda deyil, Berlində əldə olunub.

Almaniya kansleri Fridrix Merts müttəfiqləri, o cümlədən Rutte ilə bir sıra danışıqlar aparıb və Trampı Avropa qüvvələri tərəfindən Amerika silahlarının alınmasına icazə verməyə inandırıb.

Nəşrin mənbələrinə görə, bu sxem Trampa təcrid ritorikasını dəyişmədən müttəfiq kimi görünməyə imkan verir. Bu arada, Berlin, London, Skandinaviya ölkələri və Hollandiya artıq satınalma sxemində iştiraka hazır olduqlarını təsdiqləyiblər.

İki fransız rəsmisinin sözlərinə görə, Paris bu səbəbdən Amerika silahlarının alınması təşəbbüsünə qoşulmayacaq.

Fransa prezident Emmanuel Makronun çoxdankı ideyası olan öz hərbi sənayesini inkişaf etdirməkdə israr etməyə davam edir.

Kiyevin əsas tələblərindən biri Patriot hava hücumundan müdafiə sistemləridir.

Prezident Volodimir Zelenskinin sözlərinə görə, ABŞ, Almaniya və Norveç arasında yeni təchizatla bağlı artıq razılıq əldə olunub.

Xatırladaq ki, Macarıstan Ukrayna üçün Amerika silahlarının birgə maliyyələşdirilməsində iştirakdan imtina edib. Budapeşt nə pul, nə də silah verməyəcək.

ABŞ prezidenti Donald Tramp qərarı təxirə salsa da, son vaxtlar vəziyyət dəyişməyə başlayıb.

Belə ki, bir gün əvvəl Tramp ABŞ-ın Ukraynaya Patriot göndərəcəyini, lakin onların pulunu Aİ-nin ödəyəcəyini açıqlamışdı.

Almaniya Ukraynaya hava hücumundan müdafiə sistemlərinin satışı ilə bağlı ABŞ-dan “çox müsbət siqnallar” gördüklərini bildirib.

Məhərrəm Ağalaroğlu, “İki sahil”