“YAP dünənin, bu günün və gələcəyin partiyasıdır” – Ulu Öndər Heydər Əliyevin bu sözləri təkcə Yeni Azərbaycan Partiyasının siyasi mahiyyətini deyil, həm də müasir dövlətçilik tariximizin strateji inkişaf xəttini ifadə edir. Bu fikir partiyanın yaranma missiyasını, keçdiyi uğurlu inkişaf yolunu və gələcəyə yönəlmiş ideoloji istiqamətini ən dəqiq şəkildə xarakterizə edən dərin siyasi tezislərdən biridir.

1990-cı illərin əvvəlləri Azərbaycanın siyasi tarixində ən ağır və mürəkkəb dövr kimi yadda qalır. Müstəqilliyini yenicə bərpa etmiş ölkə həm daxili çaxnaşmalar, idarəetmədə qeyri-sabitlik, iqtisadi böhran, həm də Ermənistanın hərbi təcavüzü ilə üz-üzə idi. Belə tarixi bir mərhələdə xalqın nicatı üçün güclü siyasi liderliyə və milli dövlətçilik ideyasını sistemli şəkildə həyata keçirəcək təşkilata ehtiyac var idi.

Məhz bu dövrdə Heydər Əliyevə ünvanlanmış məşhur “91-lərin müraciəti” siyasi-sosial qütbləşmənin, xaosun və qeyri-müəyyənliyin fonunda xalqın iradəsini ifadə edən tarixi çağırış oldu. Bu çağırışın nəticəsində 1992-ci il 21 noyabr tarixində Yeni Azərbaycan Partiyası təsis edildi və ölkənin siyasi səhnəsində dönüş nöqtəsinə çevrildi.

YAP-ın “dünənin partiyası” adlandırılması onun yaranma zərurəti ilə bağlıdır. Partiya keçmişin çətinliklərini, xalqın mübarizəsini, dövlətçiliyin bərpası uğrunda aparılan mübarizəni özündə daşıyır. YAP-ın yaranması Azərbaycanın parçalanmaq təhlükəsi ilə üzləşdiyi bir dövrdə milli həmrəyliyin, siyasi sabitliyin və strateji idarəetmənin əsasını qoydu.

Partiyanın təsisi ilə dövlətin qarşısında dayanan ən böyük problemlərin həlli istiqamətində ilk fundamental addımlar atıldı. Heydər Əliyevin siyasi iradəsi və liderlik keyfiyyətləri sayəsində Azərbaycan müstəqilliyini yalnız elan edən deyil, onu qoruyub möhkəmləndirən dövlətə çevrildi.

Yeni Azərbaycan Partiyası bu gün Azərbaycanın sosial-siyasi həyatında aparıcı rola malik olan ən böyük siyasi təşkilatdır. Prezident İlham Əliyevin rəhbərliyi ilə partiyanın siyasi xətti müasir dövrün tələblərinə uyğun olaraq yenilənmiş, dövlət idarəçiliyinin modeli modernləşdirilmiş, beynəlxalq aləmdə ölkənin nüfuzu güclənmişdir.

Bu gün YAP:

- dövlətin modern inkişaf strategiyasını müəyyən edən,

- sosial rifah siyasətinin həyata keçirilməsində əsas siyasi dayağı təmin edən,

- cəmiyyətin müxtəlif sosial qruplarını birləşdirən,

- gənclərin siyasi aktivliyini artıran,

- milli maraqları müdafiə edən aparıcı qüvvədir.

Partiyanın təşkilati strukturu genişlənmiş, minlərlə üzvü ilə ölkənin hər bölgəsində fəal şəkildə fəaliyyət göstərir.

Heydər Əliyevin YAP-ı “gələcəyin partiyası” kimi səciyyələndirməsi partiyanın uzunmüddətli strateji ideologiyasını ifadə edir. Bu ideologiya dövlətçilik ənənələrinin qorunması, iqtisadi inkişafın davamlılığı, müasir idarəetmə modelinin təkmilləşdirilməsi, cəmiyyətin bütün sahələrində innovativ yanaşmaların tətbiqi kimi məqsədləri özündə birləşdirir.

Azərbaycanın 44 günlük Vətən müharibəsində qazandığı möhtəşəm Zəfər, 30 ilə yaxın işğal altında qalmış torpaqların azad edilməsi, yeni geosiyasi reallığın formalaşması da YAP-ın dövlətçilik ideologiyasının parlaq nəticəsi kimi qiymətləndirilir. Bu uğurlar Azərbaycanın gələcək inkişaf modeli üçün yeni strategiyaların əsasını qoyur.

Ulu Öndər Heydər Əliyevin “YAP dünənin, bu günün və gələcəyin partiyasıdır” fikri bu siyasi təşkilatın keçmişdən gələcəyə uzanan böyük yolunun fəlsəfəsini özündə birləşdirir. YAP həm tarixi zərurətin məhsulu olmuş, həm bu günün siyasi sabitliyini təmin edən qüvvə kimi formalaşmış, həm də gələcək nəslin inkişaf strategiyasını müəyyən edən milli siyasi platformaya çevrilmişdir.

Bu gün Yeni Azərbaycan Partiyası Heydər Əliyev yolunun layiqli davamçıları olaraq, ölkənin daha güclü, daha dayanıqlı və daha inkişaf etmiş gələcəyini qurmaq istiqamətində fəaliyyətini uğurla davam etdirir.

Pərvanə Əliyeva,
YAP Xətai təşkilatının fəalı