2020-ci ildə dünyanı bürüyən Covid-19 pandemiyası bəşəriyyət üçün ciddi sınaq oldu. Bir çox ölkələr bu gözlənilməz təhlükə qarşısında çətinliklərlə üzləşdi, səhiyyə sistemləri yükləndi, iqtisadiyyatlar zəiflədi, sosial həyat demək olar ki, dayanma nöqtəsinə gəldi. Belə bir mürəkkəb şəraitdə dövlət rəhbərlərinin operativ qərar qəbul etməsi, xalqın sağlamlığını və sosial rifahını qoruması xüsusi əhəmiyyət daşıyırdı. Azərbaycan Respublikasının Prezidenti İlham Əliyev Covid-19 pandemiyası dövründə həyata keçirdiyi tədbirlərlə ölkənin bu böhrandan minimum itkilərlə çıxmasına nail oldu.
Covid-19-un ilk günlərindən etibarən Azərbaycan dövləti təhlükənin miqyasını düzgün qiymətləndirdi. Prezident İlham Əliyevin rəhbərliyi ilə Nazirlər Kabineti yanında Operativ Qərargah yaradıldı və bütün qərarlar bu qurum vasitəsilə mərkəzləşdirilmiş şəkildə qəbul edildi. Bu, idarəetmədə çeviklik yaratdı və vəziyyətə uyğun olaraq sürətli addımlar atılmasına imkan verdi.
Prezidentin mütəmadi olaraq xalqa müraciətləri, televiziya çıxışları və hökumət iclasları şəffaf idarəetmənin bariz nümunəsi oldu. Dövlət başçısı həm təhlükənin ciddiliyini açıq şəkildə izah edir, həm də vətəndaşları panikaya düşməməyə, qaydalara əməl etməyə çağırırdı. Bu, cəmiyyətdə dövlətə inamı daha da gücləndirdi.
Pandemiya dövründə ən böyük yük səhiyyə sisteminin üzərinə düşürdü. Prezident İlham Əliyevin təşəbbüsü ilə qısa müddətdə modul tipli xəstəxanalar inşa olundu, mövcud tibb müəssisələri yenidən quruldu və ən müasir avadanlıqlarla təchiz edildi. Bu addımlar xəstələrin vaxtında və keyfiyyətli tibbi yardım almasına şərait yaratdı.
Bununla yanaşı, tibb işçilərinə xüsusi diqqət göstərildi. Həkimlərin və tibb personalının əməkhaqları artırıldı, onlara mükafatlar verildi, sosial təminatları gücləndirildi. Prezident İlham Əliyev dəfələrlə çıxışlarında həkimləri “ön cəbhənin döyüşçüləri” adlandıraraq onların əməyini yüksək qiymətləndirdi. Bu münasibət tibb işçilərinin məsuliyyətini və motivasiyasını daha da artırdı.
Pandemiya yalnız sağlamlıq sahəsində deyil, eyni zamanda sosial-iqtisadi sahədə də ciddi problemlər yaratdı. Bir çox insanlar iş yerlərini itirdi, gəlirləri azaldı. Prezident İlham Əliyevin göstərişi ilə geniş sosial dəstək proqramları həyata keçirildi. İşsiz və aztəminatlı ailələrə maddi yardımlar göstərildi, müavinətlər artırıldı, kredit və kommunal ödənişlərlə bağlı güzəştlər tətbiq olundu.
Xüsusilə qeyd etmək lazımdır ki, dövlət heç bir vətəndaşı bu çətin dövrdə tək buraxmadı. Sosial ədalət prinsipi əsas götürülərək yardım mexanizmləri şəffaf şəkildə həyata keçirildi. Bu siyasət bir daha göstərdi ki, Azərbaycan dövləti üçün insan amili hər zaman prioritetdir.
Pandemiya dünya iqtisadiyyatında durğunluq yaratdığı halda, Azərbaycan iqtisadiyyatı Prezident İlham Əliyevin düşünülmüş siyasəti nəticəsində nisbətən sabit qaldı. Dövlət ehtiyatlarından səmərəli istifadə edildi, strateji layihələr dayandırılmadı, sahibkarlığa dəstək proqramları davam etdirildi.
Xüsusilə kiçik və orta biznesin qorunması istiqamətində atılan addımlar mühüm rol oynadı. Vergi güzəştləri, kredit dəstəyi və digər stimullaşdırıcı tədbirlər nəticəsində minlərlə sahibkar fəaliyyətini davam etdirə bildi. Bu isə iş yerlərinin qorunmasına və sosial gərginliyin artmasının qarşısının alınmasına xidmət etdi.
Prezident İlham Əliyev pandemiya dövründə yalnız ölkə daxilində deyil, beynəlxalq arenada da fəal mövqe nümayiş etdirdi. Azərbaycan bir sıra ölkələrə humanitar yardım göndərdi, tibbi ləvazimatlarla dəstək oldu. Eyni zamanda, Azərbaycan Qoşulmama Hərəkatına sədrlik etdiyi dövrdə beynəlxalq həmrəyliyin gücləndirilməsi ilə bağlı mühüm təşəbbüslərlə çıxış etdi.
Bu addımlar Azərbaycanın dünya miqyasında nüfuzunu daha da artırdı və göstərdi ki, ölkəmiz qlobal problemlərin həllində məsuliyyətli mövqe tutur.
Covid-19 pandemiyası Azərbaycan üçün ciddi sınaq olsa da, Prezident İlham Əliyevin qətiyyətli, uzaqgörən və insan yönümlü siyasəti sayəsində bu sınaq uğurla dəf edildi. Səhiyyə sisteminin gücləndirilməsi, sosial müdafiə tədbirləri, iqtisadi sabitliyin qorunması və beynəlxalq əməkdaşlıq sahəsində görülən işlər dövlət idarəçiliyinin yüksək səviyyədə olduğunu sübut etdi.
Bu dövr bir daha göstərdi ki, güclü dövlət güclü liderlikdən başlayır. Prezident İlham Əliyevin Covid-19 dövründə gördüyü uğurlu işlər Azərbaycan tarixində məsuliyyətli və xalqına bağlı lider nümunəsi kimi yadda qaldı. Nəticə etibarilə, COVID-19 pandemiyası ilə mübarizə Azərbaycanın dövlət idarəçiliyi sisteminin çevikliyini, səhiyyə potensialını və sosial siyasətinin effektivliyini nümayiş etdirdi. Qazanılan təcrübə gələcək fövqəladə vəziyyətlərə hazırlıq baxımından mühüm əhəmiyyət kəsb edir. Azərbaycan bu qlobal böhrandan minimum itkilərlə çıxaraq sübut etdi ki, güclü dövlət, düzgün strategiya və milli həmrəylik ən çətin sınaqlardan belə uğurla çıxmağa imkan verir.
Mirhaşim Calalov,
Yeni Azərbaycan Partiyası Xətai rayon təşkilatının “Yusif Səfərov 21” ünvanı üzrə ərazi partiya təşkilatının üzvü
