Nüfuzlu beynəlxalq World Press Photo müsabiqəsinin 2026-cı il üzrə qalibi amerikalı fotojurnalist Kerol Quzi tərəfindən çəkilmiş “Ayrılmış ICE” adlı foto olub. Bu görüntü təkcə bir anı əks etdirmir, eyni zamanda müasir miqrasiya siyasətinin insan talelərinə təsirini simvolizə edən güclü vizual mesaj daşıyır.

“İki sahil” xəbər verir ki,  foto 2025-ci ilin avqust ayında "Miami Herald" qəzeti üçün Nyu-Yorkda keçirilən məhkəmə prosesindən sonra çəkilib. Kadrlarda Ekvadorlu miqrant Luis təsvir olunur. Məhkəmənin qərarına əsasən, o, ABŞ-dən deportasiya edilməli idi. Halbuki Luis ailəsinin yeganə dolanışıq mənbəyi idi. Qərardan dərhal sonra ICE əməkdaşları onu ailəsindən zorla ayırıb və məhz bu dramatik an fotoşəkildə əks olunub.

Şəkil öz emosional təsir gücü ilə seçilir. O, insanların sərt miqrasiya prosedurları fonunda yaşadığı ümidsizlik, çarəsizlik və iztirabı aydın şəkildə nümayiş etdirir. Münsiflər heyəti fotonun yalnız estetik keyfiyyətlərini deyil, həm də sosial əhəmiyyətini yüksək qiymətləndirərək onun cəmiyyət üçün vacib suallar doğurduğunu vurğulayıb.