Əməkdar müəllim: Mən heç vaxt qəbul etmərəm ki, mənim şagirdlərim hansısa bir yarışlarda və hərbi xidmətdə büdrəsin. Mənim üçün ən böyük öhdəlik məhz budur!
Bəzən bir müəllimin səsi sinif otağından kənara çıxmır, amma onun yetirdiyi şagirdlərin addımları illər sonra bütöv bir cəmiyyətin ritmini müəyyən edir. Müəllimlik – görünməyən zəhmətin, səssiz fədakarlığın, lakin ən böyük nəticələrin peşəsidir. Xüsusilə vətənpərvərlik ruhunun aşılandığı, iradənin möhkəmləndiyi, xarakterin yoğrulduğu sahədə çalışan müəllimlər təkcə dərs demir, gələcəyin dayaqlarını qururlar. Onların yetişdirdiyi gənclər sadəcə şagird deyil - sabahın müdafiəçisi, bu günün məsuliyyətli vətəndaşıdır.
Belə müəllimlərdən biri də Bakı şəhəri, Nizami rayonu Ə.Mahmudov adına 220 nömrəli məktəb-liseyin çağırışaqədərki hazırlığı rəhbəri Mübariz Məmmədovdur. Onun ömür yolu sinif otağından başlayıb yarış meydanlarına, oradan isə gənclərin qəlbinə uzanan bir zəhmət salnaməsidir. Mübariz Məmmədov “İki sahil”ə müsahibəsində bu yolun məsuliyyətindən, qazandığı uğurlardan və müəllimlik fəlsəfəsindən danışıb.
-İlk olaraq sizi daha yaxından tanıyaq. Özünüzü necə təqdim edərdiniz və çağırışaqədərki hazırlıq fənnini tədris edən müəllim kimi bu günə qədər qazandığınız pedaqoji uğurları necə dəyərləndirirsiniz?
-Bakı şəhəri, Nizami rayonu Ə.Mahmudov adına 220 nömrəli məktəb-liseyin Çağırışaqədərki hazırlıq rəhbəri Məmmədov Mübariz Vahid oğlu. 1990-cı ildən bu vəzifədə fasiləsiz olaraq çalışıram. Çalışdığım illər ərzində şagirdlərimə yüksək bilik və bacarıqlara yiyələnməyi öyrədə bilmişəm. Belə ki, məktəblilər arasında keçirilən bilik yarışmalarında və hərbi –vətən pərvərlik oyunlarında ən yüksək nəticələrə nail olmağı bacarmışıq. “Şahin” hərbi-idman yarışında 23 il Nizami rayon birincisi, 5 dəfə Respublika birincisi, adına layiq görülmüşük. Fövqaladə Hallar Nazirliyinin təşkil etdiyi “Gənc xilasedicilər və yanğın söndürənlər” yarışında 9 il fasiləsiz finala vəsiqə qazanmışıq və bu yarışda da ən yüksək nailiyyətlər əldə etmişik. 3 dəfə Respublika birincisi adına layiq görülmüşük Nailiyyətlərimizə görə Elm və Təhsil, Fövqəladə Hallar və Gənclər və İdman Nazirlərinin mükafat və diplomlarına layiq görülmüşük.
-Bu sahəyə marağınız necə yarandı və çağırışaqədərki hazırlıq müəllimi kimi fəaliyyət göstərməyə sizi nə motivasiya etdi?
-Bu sahəyə marağım məktəb illərindən yaranmışdır. Hərb tarixini çox sevərdim, hərbiçi olmaq ən böyük arzum idi. Bu gün də işləməkdən zövq alıram, yeni nailiyyətlər əldə etmək arzusu ilə çalışıram .
-Sizin üçün çağırışaqədərki hazırlıq fənninin tədrisi nə deməkdir və bu peşənin gənclərin formalaşmasında rolu nədən ibarətdir?
-Bu gün məktəblərdə çağırışaqədərki hazırlıq fənninin tədrisi gənclərin formalaşmasında böyük rolu var. Onlara Vətənə sədaqət, nizam-intizam, mərdlik, dözümlülük, çətinliklərə sinə gərmək, birlik, özünəinam kimi xüsusiyyətləri öyrətməyə imkan verir.
- Sizcə, uğurlu GÇH müəllimi olmaq üçün hansı əsas keyfiyyətlər vacibdir?
-Uğurlu ÇH müəllimi olmaq üçün tədris etdiyin fənnini şagirdlərə sevdirməyi, onlarda ən yüksək maraq yaratmağı bacarmaq lazımdır. Bunun üçün komandalarla işləməyi və onlar arasında rəqabəti gücləndirmək lazımdır. Komanda üzvlərindən biri də məhz müəllimin özü olmalıdır. “Mən etdiyimi sən də etməlisən” prinsipləri iş qurmaq vacibliyini düşünürəm.
-İlk dərs gününüzü necə xatırlayırsınız?
-İlk dərs günüm mənim üçün heç də çətin olmadı. İlk gündən şagirdləri öz ətrafımda birləşdirməyi qarşıma məqsəd qoymuşdum və ona nail oldum. Onlarla fərqli yarışlar və viktorinalar keçirərdim, ekskursiyalar təşkil edərdim.
-Pedaqoji fəaliyyətinizdə sizi formalaşdıran müəllim və ya təcrübələr olubmu?
-Pedaqoji fəaliyyətimdə məktəbin aparıcı müəllimlərindən tövsiyələr alardım, onların məsləhətlərini dinləyərdim. Onların tövsiyələri mənim işimi qurmaqda çox kömək olardı. Bu gündə ilk şagirdlərimlə əlaqə saxlamaqda davam edirəm.
- İllər ərzində şagirdlərin hərbi-vətənpərvərlik hazırlığında hansı dəyişiklikləri müşahidə etmisiniz?
-Hərbi vətənpərvərlik hazırlığında şagirdlərin fiziki hazırlığında müəyyən zəiflik müşahidə etmək olar. Onun da müəyyən səbəbləri var. Uşaqların daha çox oturaq həyat tərzinə üstünlük verməlidir.
-Müasir dövrdə şagirdlərin hərbi hazırlıq və vətənpərvərlik mövzularına marağını necə qiymətləndirirsiniz?
-Hərbi hazırlıq və vətənpərvərlik mövzularına marağı, istər keçmişdə, istərsə də müasir dövrdə, yaradan müəllimdir. Müəllimin yanaşması düzgün olarsa o zaman şagirdlərində fənnə maraq daim qorunub saxlanılacaq.
-Dərslərdə nəzəri biliklərlə yanaşı, praktik hazırlığı necə təşkil edirsiniz?
-Məktəbdə praktiki hazırlıqlar təlim silahları və digər təlim döyüş sursatları üzərindən həyata keçirilir.
Müasir texnologiyalar şagirdlərin daha çox marağına səbəb olur. Bunun üçün məktəblərdə keçmişdə “Dosaf” deyilən bir maraq dərnəyi yaradılsa maraqlı olar.
-Çağırışaqədərki hazırlıq müəllimi olmaq istəyən gənclərə tövsiyələriniz…
-İlkin hərbi bilikləri daha maraqlı etmək üçün ilk fəaliyyətim Azərbaycan Respublikası Silahlı Qüvvələrinin keçdiyi qəhrəmanlıq tarixini, çətin hərbi xidmətin nə qədər də çətin olmayacaq yollarını öyrədirəm. Ümumiyyətlə, düşünürəm ki, məktəblərdə keçirilən “Qarabağ tarixini” tarix müəllimləri yox, məhz hərbi xidmət etmiş, müharibə görmüş hərbiçilər keçsə daha çox effekt verər.
çağırışaqədərki hazırlıq müəllimi hərbi xidmət keçdikdən sonra təyin edilməsini tövsiyə edərdim. Hərbi xidmətin çətinliklərini görməyən və praktikası olmayan müəllim lazımi səviyyədə dərs keçə bilməz.
- Sizcə, bu fənn şagirdlərin gələcək həyatında və vətəndaş kimi formalaşmasında hansı rolu oynayır?
-Şagirdlər 10-cu sinif qədər necə formalaşıb gəlirlər? Deyirdim “O” Hərbi dərsin ilk günündə onlarda kəskin dəyişikliklər müşahidə etmək olar. Nizam-intizamlı olurlar, böyüklərə hörmət hissi yaranır özünəinam, güvən hisləri yüksəlir. Şagirdlərin ən çox inandığı və onlara arxa duracaq müəllim də məhz hərbi müəllimlər olur.
-Pedaqoji fəaliyyətinizdə sizi ən çox qürurlandıran uğur və ya hadisə hansıdır?
-Pedaqoji fəaliyyətimdə ən çox qürurlandığım uğur 2022-ci ildə “Şahin” hərbi idman yarışında Respublika birincisi, və 2013-cü ildə Azərbaycan Respublikası Prezidentinin müvafiq Sərəncamı ilə “Əməkdar müəllim” fəxri adına layiq görülməyimdir.
-Müəllim kimi sizi hər gün motivasiya edən əsas amil nədir?
-Məndə ən çox motivasiya yaradan şagirdlərimin hərbi bilikləri öyrənməyə marağının yüksək olmasıdır.
-Azərbaycan təhsil sistemində çağırışaqədərki hazırlıq fənninin tədrisini necə qiymətləndirirsiniz?
-Çağırışaqədərki hazırlıq fənninin tədrisi məktəblərdə fərqlidir. Eyni ilə də müəllimlərin düzgün seçilməməsində də problemlər var
-Şagirdlərdə vətənpərvərlik ruhunun gücləndirilməsi üçün hansı üsullardan istifadə edirsiniz?
-Şagirdlərdə vətənpərvərlik ruhunu gücləndirmək üçün müharibə veteranları ilə görüşlər təşkil edirik, Qarabağ müharibəsinə aid çəkilmiş filmlərə baxırıq.
-Gələcək planlarınız nədir?
- Arzu tükənməz olur deyirlər. Bizim də arzularımız çoxdur. Ən böyük arzum şagirdlərimin fiziki sağlamlığıdır. Sağlam bədəndə sağlam ruh olar. Sağlam düşüncə, sağlam ruh varsa zəfərlərimiz ard-arda gələcək.Mən heç vaxt qəbul etmərəm ki,mənim şagirdlərim hansısa bir yarışlarda və hərbi xidmətdə büdrəsin. Mənim üçün ən böyük öhdəlik məhz budur!
Yaqut Ağaşahqızı, “İki sahil”
