Rusiyada psixotrop dərman bazarında son illərdə əhəmiyyətli artım müşahidə olunur.

“İki sahil” xəbər verir ki,  "Forbes" nəşrinin AlphaRM-ın məlumatlarına istinadla yaydığı xəbərə görə, son üç ildə antidepresantların satış həcmi dəyər ifadəsində iki dəfədən çox artıb.

Statistik göstəricilər yalnız antidepresantlarla məhdudlaşmır. Eyni dövrdə anksiolitiklərin (trankvilizatorların) satışları təxminən 30%, psixostimulyatorların satışı isə 20% artıb. Satılan qablaşdırmaların sayına gəldikdə isə, 2022-ci ildən etibarən antidepresantlar üzrə artım 41%, anksiolitiklər üzrə isə 12% təşkil edib. Maraqlıdır ki, psixostimulyatorların fiziki satış həcmi əksinə, 4,6% azalıb.

Bazar strukturuna baxdıqda, antidepresant segmentində Cipralex, Trittico və Velaxin preparatları ümumi bazarın təxminən 30%-ni təşkil edir. Anksiolitiklər arasında isə Afobazol 40%-dən çox payla liderdir; Grandaxin və Tenoten də geniş istifadə olunur. Psixostimulyatorlar seqmentində isə Cortexin, Ceraxon və Phenibut üstünlük təşkil edir.

Mütəxəssislər satışların artmasını bir neçə amillə izah edir. Bunlara psixiatrik xidmətlərin daha əlçatan olması, cəmiyyətdə psixi sağlamlıqla bağlı stiqmanın azalması və diaqnostika metodlarının — o cümlədən süni intellektin tətbiqi və terapevtlərin əlavə hazırlığının — inkişafı daxildir.