Azərbaycanın dövlətçilik tarixində ordu hər zaman xüsusi yer tutmuşdur. Müstəqilliyin qorunması, ölkənin təhlükəsizliyinin təmin edilməsi və milli maraqların müdafiəsi güclü Silahlı Qüvvələrin mövcudluğunu zəruri edir. Bu baxımdan Azərbaycan Ordusu təkcə hərbi qurum deyil, həm də dövlətimizin qüdrətinin və xalqımızın iradəsinin təcəssümüdür.

Ulu Öndər Heydər Əliyev ordu quruculuğunu dövlət siyasətinin ən vacib istiqamətlərindən biri hesab edirdi. Onun fikrincə, ölkənin gələcəyi yalnız iqtisadi inkişafla deyil, həm də vətənini sevən, onu qorumağa hazır olan gənc nəslin yetişdirilməsi ilə bağlıdır. Bu səbəbdən gənclərin milli ruhda tərbiyə olunması, onlarda vətənə bağlılıq hissinin formalaşdırılması daim diqqət mərkəzində saxlanılmışdır.

Vətən sevgisi ilk növbədə ailədə, daha sonra məktəbdə və cəmiyyətdə aşılanır. Gənclər tariximizi, qəhrəmanlarımızı və milli dəyərlərimizi öyrəndikcə dövlətə bağlılıq hissi daha da möhkəmlənir. Belə bir tərbiyə gələcəkdə ordunun sıralarında xidmət edən vəzifəpərvər, intizamlı və peşəkar hərbçilərin yetişməsinə şərait yaradır.

Azərbaycan xalqı tarix boyu öz qəhrəman oğul və qızları ilə tanınıb. Torpaqlarımızın müdafiəsi uğrunda canlarından keçən şəhidlərimiz xalqımızın yaddaşında əbədi yaşayır. Onların göstərdiyi qəhrəmanlıq nümunələri gənc nəslə vətənpərvərlik dərsi verir, dövlətə xidmət etməyin müqəddəs missiya olduğunu nümayiş etdirir.

Ordunun gücü yalnız silahlarla ölçülmür. Ən müasir texnika belə yüksək mənəvi hazırlıq olmadan istənilən nəticəni verməyə bilər. Buna görə də ordunun döyüş ruhu, əsgərlərin Vətənə sevgisi və xalqın onlara olan inamı böyük əhəmiyyət daşıyır. Xalqın dəstəyini hiss edən hərbçi daha məsuliyyətli, daha əzmkar və daha qətiyyətli olur.

Azərbaycanın əldə etdiyi hərbi uğurlar xalqla ordunun qarşılıqlı etimadının nəticəsidir. Xüsusilə son illərdə ölkəmizin qazandığı nailiyyətlər göstərdi ki, cəmiyyətlə Silahlı Qüvvələr arasında möhkəm bağlar mövcuddur. Bu bağlar dövlətimizin güclənməsinə, milli birliyin daha da möhkəmlənməsinə xidmət edir.

Bu gün Azərbaycan Ordusu regionun ən hazırlıqlı və güclü ordularından biri kimi tanınır. Ordumuzun peşəkarlığı, müasir silah sistemləri ilə təchiz olunması və şəxsi heyətin yüksək hazırlığı dövlətimizin təhlükəsizliyinin etibarlı təminatına çevrilib. Lakin bütün bunlarla yanaşı, ordunun ən böyük dayağı xalqın ona olan sevgisi və etimadıdır.

Müasir dövrdə hər bir vətəndaş ordunun güclənməsinə öz töhfəsini verməlidir. Gənclərin vətənpərvərlik ruhunda tərbiyəsi, şəhidlərimizin xatirəsinin yaşadılması, qazilərimizin qəhrəmanlığının təbliği və milli birlik hissinin möhkəmləndirilməsi bu istiqamətdə mühüm əhəmiyyət daşıyır.

Azərbaycanın gələcək uğurlarının əsasında güclü dövlət, vətənpərvər xalq və qüdrətli ordu birliyi dayanır. Bu dəyərlər qorunduqca ölkəmiz daha da inkişaf edəcək, milli təhlükəsizliyimiz etibarlı şəkildə təmin olunacaq və Azərbaycan dünya miqyasında öz mövqeyini daha da gücləndirəcəkdir.

Ordusuna güvənən xalq həmişə qalib olur. Azərbaycan xalqı da öz ordusuna inanır, onun uğurları ilə qürur duyur və dövlətimizin qüdrətinin daha da artması naminə bu birliyi gələcək nəsillərə ötürür.

Fidan Əliyeva,
YAP Xətai rayon təşkilatının məsləhətçisi