Qazaxıstan Respublikası Rusiya Federasiyasında yaşanan kəskin yanacaq qıtlığı fonunda daxili bazarı qorumaq məqsədilə qonşu dövlətlərdən gələn həm yük, həm də minik avtomobillərinin ölkəyə giriş-çıxışını sutkada cəmi bir dəfə olmaqla məhdudlaşdırıb.

“İki sahil” "Tengrinews.kz"-ya istinadla xəbər verir ki, bu barədə Qazaxıstanın energetika nazirinin müavini Qayırxan Tutqışbayev keçirdiyi rəsmi brifinqdə məlumat verib.

Nazir müavini mətbuata açıqlamasında qərarın səbəblərini belə izah edib: "Hazırda qüvvədə olan yeni qaydalara əsasən, sərhədyanı dövlətlərdən gələn yük və minik nəqliyyat vasitələri Qazaxıstan ərazisinə sutkada birdən artıq olmamaq şərtilə daxil ola bilərlər. Bu addım ölkədən yanacaq-sürtkü materiallarının qeyri-qanuni, yəni 'boz' sxemlərlə kütləvi şəkildə daşınmasının qarşısını almaq üçün qəbul edilmiş kompleks tədbirlər çərçivəsində reallaşdırılıb".

Qazaxıstanda hazırda avtomobil nəqliyyatı ilə neft məhsullarının ayrı-ayrı növlərinin, eləcə də dəmir yolu vasitəsilə yüngül distillatların ölkədən çıxarılmasına rəsmi qadağa qüvvədədir. Ötən ayın sonunda respublikanın Baş naziri Oljas Bektenov sərhədlərdə nəzarəti maksimum dərəcədə gücləndirmək və daxili bazarda yanacaq qıtlığına yol verməmək barədə aidiyyəti qurumlara birbaşa tapşırıq vermişdi. Buna baxmayaraq, Qazaxıstan Energetika Nazirliyi gələcəkdə Rusiyaya rəsmi qaydada yanacaq tədarükünün mümkünlüyünü də istisna etməmişdi.