Çinin Milli Meteorologiya Mərkəzinin məlumatına görə, Noul tayfununun şənbə axşamı ilə bazar günü səhər saatları arasında Honkonqdan Quandun əyalətinədək uzanan sahil zolağına çatacağı gözlənilir.

“İki sahil” xəbər verir ki, tayfunun leysan yağışları və güclü küləklər gətirəcəyi təhlükəsi səbəbindən Çin hakimiyyəti ölkənin cənubunda 340 mindən çox insanı təxliyə edib, dəmir yolu nəqliyyatının hərəkətini dayandırıb. Honkonqda isə bir sıra aviareyslər ləğv olunub.

Çinin Milli Meteorologiya Mərkəzi şənbə günü tayfunla bağlı narıncı xəbərdarlığı – dördpilləli xəbərdarlıq sistemində ikinci ən yüksək səviyyəni – qüvvədə saxlayıb. Mərkəz bildirib ki, iyulun 25-dən 27-dək Quandun, eləcə də qonşu Hunan və Tsyansi əyalətlərində güclü yağışlar gözlənilir. Tayfunun sahilə çatarkən 151–173 km/saat sürətində davamlı küləklərlə müşayiət olunacağı proqnozlaşdırılır.

Çinin dövlət televiziyası CCTV-nin məlumatına görə, cümə axşamından etibarən Quandun əyalətində 340 mindən çox sakin təxliyə olunub. Quançjou, Donquan və Şantou da daxil olmaqla 12 şəhərdə məktəblər və iş yerləri bağlanıb, ictimai nəqliyyatın fəaliyyəti tam və ya qismən dayandırılıb. Bazar günü Quandun əyalətində bütün dəmir yolu hərəkəti dayandırılacaq.

Cathay Pacific aviaşirkəti tayfun səbəbindən bazar günü saat 01:15-dən 18:00-dək Honkonq Beynəlxalq Hava Limanına bütün gəliş və gediş reyslərini ləğv etdiyini açıqlayıb. Honkonq Hava Limanı İdarəsinin məlumatına görə, şənbə gününə olan vəziyyətə əsasən 49 reys ləğv edilib, 238 reys isə gecikib.

Quandun əyalətində yerləşən Şençjen Baoan Beynəlxalq Hava Limanı da aviaşirkətlərin bazar günü səhərdən günortayadək uçuş cədvəllərini hava şəraitinə uyğun şəkildə tənzimləyəcəyini açıqlayıb.