Beynəlxalq Futbol Federasiyasının (FIFA) prezidenti Canni İnfantino 2030-cu il dünya çempionatının tarixdə ən yaxşısı olacağına əminliyini ifadə edib.

“İki sahil” xəbər verir ki, İnfantino bu barədə Mərakeşə səfəri zamanı bildirib.

"Mərakeşlilər öz milli komandasının uğurlarını sevinc və coşqu ilə qeyd edən ehtiraslı futbol azarkeşləridir", - İnfantino qeyd edib.

Onun sözlərinə görə, 2030-cu il dünya çempionatı tarixdə ən yaxşısı olacaq.

"O ən yaxşısı olacaq, çünki ən gözəl ölkələrin ən gözəli olan Mərakeşdə keçiriləcək. Yaşasın Mərakeş! Məni qəbul etdiyiniz üçün təşəkkür edirəm", - deyə "COPE" radiostansiyası FIFA rəhbərinin sözlərini çatdırıb.

2030-cu il dünya çempionatı Argentina, Paraqvay, Uruqvay, İspaniya, Portuqaliya və Mərakeşdə keçiriləcək. Bununla belə, turnirin əsas hissəsinə İspaniya, Portuqaliya və Mərakeş ev sahibliyi edəcək, Uruqvay, Argentina və Paraqvay isə ilk dünya çempionatının 100 illiyi şərəfinə bir start matçı keçirəcək.