“İdeoloji təhlükəsizlik də fiziki təhlükəsizlik kimi önəmlidir. Çünki ideoloji təxribat ölkənin içinə istiqamətləndirilir”.
Prezident İlham Əliyevin bu fikirləri bu gün ölkəmizdə cəmiyyətin həssas məsələləri ətrafında aparılan müzakirələr fonunda xüsusi əhəmiyyət daşıyır.
Son günlər məktəblərdə vahid geyim qaydaları ilə bağlı məsələlər ətrafında aparılan müzakirələr ictimaiyyətin diqqətindədir. Belə həssas mövzulara münasibət bildirərkən emosiyalara qapılmaq, təsdiqlənməmiş məlumatları yaymaq və insanları qarşı-qarşıya qoyan yanaşmalara yol vermək əvəzinə, faktlara, qanunvericiliyə və məsələnin mahiyyətinə əsaslanmaq lazımdır.
Nazirlər Kabinetinin dövlət ümumi təhsil müəssisələrində şagirdlərin geyim formaları ilə bağlı qəbul etdiyi qərarda məktəbli formasının vahidliyini pozan və ümumi təhsilin dünyəvilik prinsipinə uyğun olmayan geyim elementlərindən istifadəyə yol verilmədiyi göstərilir. Qərarın mətnində baş örtüyü qeyd olunmasa da, onun tətbiqi ətrafında müxtəlif ictimai müzakirələr yaranıb.
Məhz buna görə məsələyə fərqli anlayışları bir-birinə qarışdırmadan yanaşmaq vacibdir. Dövlət ümumi təhsil müəssisələrində müəyyən edilmiş geyim qaydaları ilə insanların dini etiqad azadlığına hörmət məsələsi eyni müstəvidə qarşı-qarşıya qoyulmamalıdır. Hər iki məsələnin müzakirəsi hüquqi çərçivə, dünyəvi təhsil prinsipləri və qarşılıqlı hörmət əsasında aparılmalıdır.
Burada bir məqamı xüsusilə diqqətdə saxlamaq lazımdır: cəmiyyətdə həssaslıq yaradan mövzular bəzən ölkə daxilində qarşıdurma yaratmaq istəyən kənar qüvvələrin təsir vasitəsinə çevrilə bilər. Azərbaycan cəmiyyətinin müxtəlif təbəqələri arasında dini inanclar, dünyagörüşü və sosial məsələlər üzrə fərqli yanaşmaların olması təbiidir. Lakin bu fərqlərdən istifadə edərək insanları bir-birinə qarşı qoymaq, mövcud məsələləri qəsdən şişirtmək və cəmiyyətdə çaxnaşma yaratmaq istəyən çağırışlara qarşı ayıq-sayıq olmaq lazımdır.
Xüsusilə xaricdən yayılan və ya xarici maraqların təsiri altında formalaşdırılan informasiya kampaniyalarında müəyyən məsələlərin həqiqi mahiyyətindən uzaqlaşdırılaraq təqdim edilməsi, emosional ifadələrlə qabardılması və cəmiyyətdə parçalanma yaratmağa hesablanması ehtimalı nəzərdən qaçırılmamalıdır. Düşünən vətəndaş belə cəhdlərin təsiri altına düşməməli, heç bir kənar qüvvənin ölkə daxilində qarşıdurma yaratmaq niyyətinə alət olmamalıdır.
Bu isə o demək deyil ki, cəmiyyətdəki hər hansı məsələnin müzakirəsinə ehtiyac yoxdur. Əksinə, ictimai əhəmiyyət daşıyan məsələlər açıq və sağlam şəkildə müzakirə olunmalıdır. Lakin müzakirə ilə təxribatı, tənqidlə qarşıdurma çağırışını, faktla manipulyasiyanı bir-birindən ayırmaq lazımdır.
Müasir informasiya mühitində bu məsuliyyət daha da artır. Sosial şəbəkələr, süni intellekt və digər texnoloji imkanlar vasitəsilə məlumatların sürətlə yayılması yanlış informasiyanın da geniş auditoriyaya çatmasına şərait yaradır. Buna görə hər bir vətəndaş paylaşdığı məlumatın mənbəyini və doğruluğunu yoxlamalı, şayiələrə və emosional çağırışlara ehtiyatla yanaşmalıdır.
Prezident İlham Əliyev də VIII Qurultayda ideoloji təhlükələrə qarşı mübarizədə təhsilin xüsusi rolunu vurğulayıb: “Xalqımız nə qədər təhsilli, bilikli, savadlı olarsa, o qədər də bax, bu yalanlara, bu şayiələrə, zəhərlə dolu olan bu ideoloji təxribatlara uymayacaq”.
Həqiqətən də, təhsil insana yalnız bilik qazandırmır. O, həm də hadisələri təhlil etmək, doğru ilə yanlışı ayırmaq, müxtəlif mənbələri müqayisə etmək və müstəqil nəticəyə gəlmək bacarığı formalaşdırır. Savadlı və sağlam düşüncəli cəmiyyət manipulyasiyalara qarşı daha dayanıqlı olur.
Digər mühüm amil isə vətənpərvərlikdir. Tarixini, milli-mənəvi dəyərlərini və dövlətçilik ənənələrini bilən, ölkəsinin taleyinə məsuliyyətlə yanaşan vətəndaş cəmiyyətin birliyini qorumağın əhəmiyyətini daha yaxşı dərk edir.
Vətənpərvərlik həm də həssas məqamlarda məsuliyyətli davranmaq, ölkə daxilində qarşıdurma yarada biləcək çağırışlara uymamaq və milli həmrəyliyi qorumaqdır.
Bu gün əsas vəzifəmiz müxtəlif mövzular ətrafında süni qarşıdurmalar yaratmaq deyil, sağlam düşüncəni, qarşılıqlı hörməti və milli birliyi qorumaqdır. Fikir ayrılıqları cəmiyyətdə ola bilər. Əsas məsələ həmin fərqlərin parçalanmaya çevrilməsinə imkan verməməkdir.
Unutmayaq: xaricdən yönləndirilən hər hansı təxribatın ən böyük uğuru cəmiyyət daxilində ona könüllü şəkildə tərəfdaş tapması olardı. Buna yol verməməyin yolu isə məlumatlı olmaq, düşünmək, faktlara əsaslanmaq və milli birliyi qorumaqdır.
Təhsilli cəmiyyət, vətənpərvər vətəndaş, informasiya məsuliyyəti və milli həmrəylik ideoloji təhlükəsizliyimizin ən güclü dayaqlarıdır.
Bəxtiyar ƏLİYEV
Azərbaycan Jurnalistlər Birliyinin üzvü
"Naxçıvan Şəhid Ailələri" İctimai Birliyinin mətbuat katibi
