Çin bütün maraqlı tərəfləri gərginlik səviyyəsini azaltmağa və Koreya yarımadasında siyasi tənzimləməyə çağırır.

“İki sahil” xəbər verir ki, bu barədə Çin Xarici İşlər Nazirliyinin rəsmi nümayəndəsi Mao Nin KXDR-in yeni növ döyüş sursatını sınaqdan keçirməsi ilə bağlı sualı belə şərh edib.

"Çin tərəfi müvafiq məlumatları, həmçinin KXDR-in son zamanlar ABŞ, Koreya Respublikası və Yaponiyanın hərbi tədbirləri ilə bağlı öz mövqeyini dəfələrlə bəyan etməsini nəzərə alıb", — deyə diplomat qeyd edib.

"Ümid edirik ki, maraqlı tərəflər Koreya yarımadası probleminin köklü səbəblərini obyektiv şəkildə nəzərdən keçirəcək, siyasi tənzimləmə üzrə ümumi xəttə sadiq qalacaq, gərginliyin azaldılması, regionda sülh və sabitliyin saxlanılması üçün səylər göstərəcəklər", — deyə o əlavə edib.

Koreyanın Mərkəzi Teleqraf Agentliyinin məlumatına görə, oktyabrın 31-də taktik balistik raketin səpələnmə döyüş başlığının döyüş şəraitində tətbiq olunma imkanlarını və gücünü qiymətləndirmək məqsədilə sınaq keçirilib. Agentlik vurğulayıb ki, zədələnmə zonası təxminən 12-13 hektar təşkil edir.