Azərbaycan Respublikasının Rəqəmsal İnkişaf və Nəqliyyat Nazirliyi ilə Dövlət Turizm Agentliyinin birgə yaydıqları məlumatda bildirilir ki, iyulun 23-dən etibarən xarici ölkə vətəndaşları da Azərbaycanın işğaldan azad edilmiş ərazilərinə müvafiq icazə almaqla həm fərdi nəqliyyat vasitələri ilə, həm də qrup halında Şuşa, Laçın, Ağdam, Füzuli, Xocalı və Xankəndi şəhərlərinə səfər edə biləcəklər.
Xüsüsilə ilə işğaldan azad edilən rayonlara fərdi minik avtomobilləri ilə səfər etmək istəyən qonaqlar «Yolumuz Qarabağa» (www.yolumuzqarabaga.az) portalı üzərindən icazə ala biləcəklər. Əcnəbilər, həmçinin «Yolumuz Qarabağa» portalı vasitəsilə səfər etdikləri istiqamətlərdə fəaliyyət göstərən hotel və digər yerləşmə məntəqələri barədə məlumat əldə edə biləcəklər. Həmçinin onlar sözügedən ərazilərə qrup halında da səfər edə bilərlər. İcazələrin etibarlılıq müddəti isə 5 gündür.
Ümumiyyətlə, son bir neçə ildə ölkəmizə turisit axını artmaqda davam edir, Dövlət Turizm Agentliyinin Turizm siyasəti və strategiyası şöbəsinin müdir müavini Günay Bayramova mətbuata açıqlamasında bildirib ki, 2024-cü ildə turizm sektorunun ölkə iqtisadiyyatındakı payı 4.5 faiz, o cümlədən qeyri-neft və qaz sektorunda isə 6.7 faiz olub. O, həmçinin 2018-2024-cü illərdə turistlərin yerləşdirilməsi və ictimai iaşə fəaliyyəti növü üzrə ÜDM istehsalının illik orta hesabla 3.8 faiz artdığını, bunun nəticəsində 7 il ərzində bu sektorda yaradılan əlavə dəyərin 30 faiz yüksələrək 2024-cü ildə 3.1 milyard manata çatdığını bildirib.
Günay Bayramova 2017-2024-cü illərdə mehmanxana və mehmanxana tipli müəssisələrin sayının 44.4 faiz, onların birdəfəlik tutumunun isə 62 faizə yaxın artdığını vurğulayıb.Ümumiyyətlə, 2025-ci ilin ilin I yarısında Azərbaycana 178 ölkədən 1 milyon 217,4 min əcnəbi və vətəndaşlığı olmayan şəxs səfər edib. Gələnlərin əsas hissəsi Rusiya (25,8 faiz), Türkiyə (17,6 faiz ), Hindistan (9,4 faiz), İran (8,2 faiz ), Gürcüstan (4,2 faiz), Qazaxıstan (3,7 faiz ), Səudiyyə Ərəbistanı (3,2 faiz), Pakistan (2,9 faiz ), Çin (2,1 faiz) vətəndaşları olub.
Təbii ki, postmüharibə dövründə Qarabağ və Şərqi Zəngəzur iqtisadi rayonlarında aparılan iri həcmli tikinti-quruculuq işləri ölkəmizə gələn xarici turistərin də diqqətini çəkir. Bu isə o deməkdir ki, Azərbaycana gələn turistlərin sayında xeyli artımlar gözlənilir. Bundan başqa, əcnəbilərin həmin ərazilərə turist kimi səfərləri erməni vandalizminin izlərinin öz gözləri ilə görmələri baxımından da önəmlidir. Xarici turistlərin Qarabağa və Şəqi Zəngəzura rahat səfr emələri üçün yol-nəqliyyat infrastrukturu da yaradılıb. Xüsusilə Şuşaya, Laçına, Ağdama çəkilən magistral yollar, Füzuli və Laçın beynəlxalq hava limanları, tezliklə istifadəyə veriləcək Bakı-Ağdam- Xankəndi dəmir yollarındakı sürətli qatarlar turistlərin təhlükəsiz və rahat səfərlərinə şərait yaradacaqdır. Başlıcası isə Şuşada, Laçında, Ağdamda, Xankəndidə yaradılan ən müasir otellər turistlər üçün istirahətin əsas məkanı olacaqdır.
Ümumiyyətlə, beynəlxalq aləmdə ölkəmizin turizm potensial yüksək dəyərləndirilir. Çünki Azərbaycan zəngin təbii sərvətlərə, rəngarəng iqlimə, qədim və zəngin tarixi-mədəni irsə, ən başlıcası isə təbiət möcüzələrinə mlik ölkə kimi tanınır. Bu önəmli faktı dəyərləndirən dövlətimiz turizm sahəsinin inkişafını da prioritet elan edib. Xüsuüsilə Prezident İlham Əliyevin sosial siyasətində turizmin inkişafı ön sıralardadır. Məlumdur ki, turizm bir çox ölkələrin gəlir sahəsi kimi inkişaf edərək dövlət büdcəsinin formalaşmasında önəmli rol oynayır. Məsələn, Avropa ölkələri hər il bu sahədən təqribən 100 milyard dollar gəlir əldə edirlər. Qardaş Türkiyənin də bu istiqamətdə böyük uğurları var. Belə ki, 2023-cü ildə bu ölkənin turizmdən qazancı təqribən 30 milyard dollar həcmində hesablanıb. Əslində, turizm qazanc mənbəyi olmaqla bərabər, həm də ölkənin tanıdılmasını, onun müasir dünyaya çıxışını sürətləndirən faktordur. Məhz həyata keçirilən tədbirlər Azərbaycanı turizm həvəskarları üçün cəlbedici məkana çevirib.
Dövlət Turizm Agentliyinin sədrinin müşaviri Kənan Quluzadənin mətbuata açıqlamasında bildirilib ki, 2030-cu ilə qədər turizm sektorunda ÜDM istehsalının 11.5 milyard manata, turizmin qeyri-neft və qaz iqtisadiyyatındakı payının 8.2 faizə, turizm üzrə daxilolmaların 7.4 milyard manata çatacağı proqnozlaşdırılır. Həmçinin vurğunlanıb ki, bu dövr ərzində regionların xarici turist gecələmələrindəki xüsusi çəkisi 46 faizə, turizm sənayesinin muzdlu əmək bazarındakı payın isə 5.8 faizə yüksələcək.
Elçin Zaman, "İki sahil"
