İsveçdə "Ozempic" preparatının qaçaqmalçılığı və qeyri-qanuni satışı sürətlə artır.

“İki sahil” xəbər verir ki, “Ozempic” ilkin olaraq diabet dərmanı kimi hazırlanıb, lakin iştahı və çəkini azaltmaq kimi effekti yaradıb.

Dövlət Əczaçılıq İdarəsinin məlumatına görə, cinayətkar biznesə əvvəllər narkotik və dopinq ticarəti ilə məşğul olan həmin qruplaşmalar qoşulub.

Gömrük artıq saxta dərmanın ən böyük partiyalarını - kapsulları və yüzlərlə flakonu müsadirə edib, lakin qiymətləndirmələrə görə, bu, bazarın yalnız kiçik bir hissəsidir. İlin əvvəlindən indiyədək 400-dən çox inyeksiya qələmi və ampula müsadirə olunub. Norveç gömrüyü İsveçdən göndərilən partiyaları da ələ keçirib.

Saxta “Ozempic” sosial mediada, o cümlədən ictimai fikrə təsir edənlər tərəfindən fəal şəkildə reklam olunur. Əczaçılıq İdarəsi preparatın qeyri-qanuni satışını həyata keçirən 20-yə yaxın internet saytı müəyyən edib ki, onların arxasında da çirkli pulların yuyulması ilə məşğul olan bir neçə mütəşəkkil şəbəkə dayanır.

Ekspertlər ciddi risklər barədə xəbərdarlıq edirlər - alıcılar saxta məhsulların dəqiq nədən ibarət olduğunu bilmirlər. Həddindən artıq dozadan sonra xəstəxanaya yerləşdirmə halları qeydə alınıb və müxtəlif aktiv maddələrin qarışıqları aşkar edilib.

“Ozempic”in satışını həyata keçirənlər bir ilədək azadlıqdan məhrum edilmə ilə cəzalandırılır, lakin qanunvericilikdəki boşluqlar və məhdud resurslar səbəbindən polis və gömrük bu bazarla effektiv mübarizə apara bilmir. Hökumət əczaçılıq idarəsinə problemin həlli üçün təkliflər hazırlamağı tapşırıb – hesabatın hazırlanması gələn ilin yanvarında gözlənilir.