Professor Gülnaz Dadaşova: Yaxın gələcəkdə süni intellekt həkimin rəqibi deyil, onun ən güclü tərəfdaşına çevriləcək
Müasir tibb sürətlə inkişaf edən, innovasiyaların və elmi nailiyyətlərin insan sağlamlığına yeni imkanlar qazandırdığı sahələrdən biridir. Xüsusilə ürək-damar xəstəlikləri və onkoloji problemlərin artdığı bir dövrdə kardiologiyanın yeni istiqamətləri, eləcə də süni intellekt və robotik texnologiyaların səhiyyəyə inteqrasiyası dünya tibb ictimaiyyətinin diqqət mərkəzindədir. Bu yeniliklər yalnız xəstəliklərin diaqnostika və müalicə üsullarını təkmilləşdirmir, həm də tibbin gələcək inkişaf trayektoriyasını müəyyənləşdirir.
Türk Dövlətləri Kardio-Onkologiya Konqresi və Süni İntellekt və Robotik Kardiologiya Sammitinin Azərbaycanda keçirilməsi ölkəmizin beynəlxalq tibbi əməkdaşlıq məkanında mövqeyinin daha da gücləndiyini göstərən əlamətdar hadisələrdən biridir. Dünyanın müxtəlif ölkələrindən alimləri, həkimləri və səhiyyə mütəxəssislərini bir araya gətirən bu mötəbər platforma elmi təcrübə mübadiləsi, yeni texnologiyaların tətbiqi və gələcəyin tibbi yanaşmalarının müzakirəsi baxımından mühüm əhəmiyyət daşıyır.
Konqres və sammitin əhəmiyyəti, kardio-onkologiyanın müasir tibbdə artan rolu, süni intellekt və robotik texnologiyaların kardiologiyanın gələcəyinə təsiri, eləcə də Azərbaycanın səhiyyə sisteminə verəcəyi töhfələr barədə suallarımızı Səhiyyə Nazirliyi Elmi-Tədqiqat Kardiologiya İnstitutunun direktoru, professor Gülnaz Dadaşovaya ünvanladıq.
-Türk Dövlətləri Kardio-Onkologiya Konqresi və Süni İntellekt və Robotik Kardiologiya Sammitinin Azərbaycanda keçirilməsi ölkəmiz üçün nə deməkdir?
-Bu tədbir Azərbaycanın beynəlxalq tibb məkanında artan rolunun və nüfuzunun göstəricisidir. Son illər ölkəmizdə səhiyyə sahəsində həyata keçirilən islahatlar, tibbi infrastrukturun yenilənməsi və innovativ yanaşmalara verilən önəm artıq beynəlxalq səviyyədə diqqəti cəlb edir. Bakıda dünyanın müxtəlif ölkələrindən alimlərin, həkimlərin və texnologiya liderlərinin bir araya gəlməsi təsadüfi deyil.
Bu konqres və sammit təkcə elmi bilik mübadiləsi platforması deyil, həm də gələcək əməkdaşlıqların, ortaq layihələrin və yeni tibbi yanaşmaların formalaşdığı strateji məkandır. Bu gün müzakirə etdiyimiz texnologiyalar sabah minlərlə insanın həyatını xilas edə bilər. Bu gün Bakıda gələcəyin kardiologiyasının xəritəsi hazırlanır.
Türk dünyasının tibbi potensialı birləşdikdə
regional deyil, qlobal gücə çevrilə bilər
-Tədbirdə 11 ölkənin iştirakı hansı mesajı verir?
-Müasir dünyada heç bir ölkə tibbin bütün çağırışlarını təkbaşına həll edə bilməz. Elmi əməkdaşlıq və təcrübə mübadiləsi inkişafın əsas şərtidir. Bu baxımdan 11 ölkədən mütəxəssislərin Bakıda bir araya gəlməsi böyük əhəmiyyət daşıyır.
Burada yalnız məruzələr təqdim olunmur. Yeni əməkdaşlıqlar qurulur, ortaq tədqiqat layihələrinin əsası qoyulur və gələcək illərin səhiyyə gündəliyi formalaşdırılır. Bu platforma Türk dünyasının və beynəlxalq elmi ictimaiyyətin səhiyyə sahəsində daha sıx inteqrasiyasına xidmət edir. Türk dünyasının tibbi potensialı birləşdikdə regional deyil, qlobal gücə çevrilə bilər.
-Bu Sammit Azərbaycan səhiyyəsinin gələcəyi üçün hansı yeni qapıları açır?
-Bu tədbirin ən böyük dəyəri onun uzunmüddətli təsirindədir. Burada müzakirə olunan ideyalar gələcəkdə yeni tədqiqatların, innovativ layihələrin, texnologiya transferinin və beynəlxalq təhsil proqramlarının yaranmasına səbəb olacaq.
Azərbaycan səhiyyəsi artıq rəqəmsal transformasiya mərhələsinə daxil olub. Süni intellekt, böyük məlumat bazalarının analizi, robotik sistemlər və telemedisin gələcək illərdə səhiyyə sistemimizin ayrılmaz hissəsinə çevriləcək. Bu Sammit isə həmin prosesin sürətlənməsinə ciddi töhfə verir.
Bakı Sammit üç günlük tədbir deyil, gələcəyin səhiyyəsinə yatırılan strateji investisiyadır.
Bəzi hallarda onkoloji müalicələrin ürək-damar sisteminə təsiri müşahidə olunur
-Kardio-onkologiya niyə bu qədər aktual sahəyə çevrilib?
-Bu gün onkoloji xəstəliklərdən sağalan insanların sayı sürətlə artır və bu, müasir tibbin ən böyük nailiyyətlərindən biridir. Lakin bəzi hallarda onkoloji müalicələrin ürək-damar sisteminə təsiri müşahidə olunur. Kardio-onkologiya məhz bu iki mühüm sahənin kəsişməsində yaranaraq xəstələrin həm onkoloji, həm də kardioloji baxımdan qorunmasına xidmət edir.
Bu istiqamət bizə yalnız xəstəliyi müalicə etməyi deyil, insanın gələcək həyat keyfiyyətini qorumağı öyrədir. Məhz buna görə kardio-onkologiya XXI əsrin ən perspektivli tibbi istiqamətlərindən biri hesab olunur. Müasir tibb artıq xəstəliyi deyil, insanın gələcəyini müalicə etməyə çalışır.
Süni intellekt həkimin rəqibi deyil, onun ən güclü tərəfdaşına çevriləcək
-Süni intellekt və robotik texnologiyalar kardiologiyanın gələcəyini necə dəyişəcək?
-Dünya səhiyyəsi yeni transformasiya mərhələsinə daxil olur. Əgər uzun illər ərzində əsas diqqət müalicə üsullarının təkmilləşdirilməsinə yönəlirdisə, bu gün əsas məqsəd xəstəlikləri daha erkən aşkarlamaq, riskləri qabaqcadan müəyyən etmək və hər bir pasiyent üçün fərdiləşdirilmiş müalicə strategiyası qurmaqdır.
Süni intellekt böyük həcmdə tibbi məlumatları analiz edərək həkimlərə daha sürətli və daha dəqiq qərarlar qəbul etmək imkanı verir. Robotik texnologiyalar isə mürəkkəb müdaxilələrin daha yüksək dəqiqliklə həyata keçirilməsinə şərait yaradır. Bu, tibbdə keyfiyyət və təhlükəsizlik anlayışını yeni səviyyəyə qaldırır.
Yaxın gələcəkdə süni intellekt həkimin rəqibi deyil, onun ən güclü tərəfdaşına çevriləcək.
Yaqut Ağaşahqızı, “İki sahil”
