İran və Oman Hörmüz boğazında təhlükəsizlik sazişinə nail olmaq üçün danışıqlar aparır, lakin bu proses ABŞ, İsrail və kənar qüvvələrin müdaxiləsi səbəbindən ləngiyir.
“İki sahil” xəbər verir ki, bu barədə İran İslam Respublikası Xarici İşlər Nazirliyinin mətbuat katibi Esmail Baqai keçirdiyi mətbuat konfransında bildirib.
"Omanla dəniz gəmiçiliyi üzrə "yol xəritəsi"nin hazırlanması ABŞ və İsrailin fəaliyyətlərindən qaynaqlanan təhlükəsizlik mürəkkəblikləri, iştirakçıların çoxluğu və destruktiv qüvvələrin təxribat cəhdləri səbəbindən uzanıb", — deyə Baqai vurğulayıb.
O əlavə edib ki, Tehran və Maskat "iki sahilyanı dövlətin hüquqlarına riayət olunmasını təmin edən və ticarət gəmilərinin təhlükəsiz keçidini zəmanət altına alan" mexanizm yaratmağa çalışır.
Avqustun 5-də Baqai İran və Omanın Hörmüz boğazından keçəcək yeni dəniz marşrutunun coğrafi koordinatlarını razılaşdırdığını açıqlamışdı. Bununla belə, o xüsusi olaraq qeyd edib ki, Tehran və Maskat arasında gələcəkdə imzalanacaq müqavilə boğazın dərhal açılması anlamına gəlmir və bu məsələ birbaşa ABŞ-ın atacağı addımlardan və hərbi dəniz blokadasını dayandırmasından asılıdır.
