Qərbi Azərbaycan İcması Azərbaycanda akkreditə olunmuş diplomatik korpus nümayəndələrinin Qarabağ və Şərqi Zəngəzura son səfərinə Ermənistanın kəskin reaksiya verməsini pisləyib.

“İki sahil” xəbər verir ki, icmanın bəyanatında bildirilib ki, bu yanaşma Azərbaycanın suverenliyinə və ərazi bütövlüyünə hörmətsizlik kimi qiymətləndirilir. Qeyd olunub ki, Azərbaycan və Ermənistanın sülhə doğru yaxınlaşdığı bir vaxtda bu cür addımlar sülh prosesinə zərbə vurur, qarşılıqlı etimadı zəiflədir və revanşist qüvvələri təşviq edir.

Bəyanatda Ermənistanın mövqeyi Azərbaycanın daxili işlərinə müdaxilə cəhdi və irredentizmin yenidən alovlandırılmasına yönəlmiş addım kimi dəyərləndirilib. İcma vurğulayıb ki, Ermənistan cəmiyyəti Azərbaycanın suveren əraziləri və tarixi ilə bağlı əsassız iddialar irəli sürmək əvəzinə, Ermənistan ərazisində Azərbaycan xalqının yaratdığı mədəni-tarixi irsin inkarı, təhrif olunması və dağıdılması məsələlərinə diqqət yetirməlidir. Bunun iki ölkə və xalq arasında davamlı sülhün bərqərar olmasına xidmət edəcəyi qeyd olunub.