Sentyabrın 15-də Yeni Azərbaycan Partiyası (YAP) Beyləqan rayon təşkilatının XII konfransı keçirilib.
“İki sahil” xəbər verir ki, əvvəlcə xalqımızın Ümummilli Lideri Heydər Əliyevin abidəsi ziyarət edilib, önünə gül dəstələri düzülüb.
Tədbirdə Ulu Öndər Heydər Əliyevin, ölkəmizin ərazi bütövlüyü və suverenliyi uğrunda canlarından keçmiş şəhidlərin xatirəsi bir dəqiqəlik sükutla anılıb. Azərbaycan Respublikasının Dövlət Himni səsləndirilib.
Konfransda YAP Beyləqan rayon təşkilatının sədri Müşfiq Səfərov hesabat məruzəsi ilə çıxış edib. O bildirib ki, müasir müstəqil Azərbaycan Prezident, Yeni Azərbaycan Partiyasının Sədri İlham Əliyevin rəhbərliyi ilə möhtəşəm uğurlara imza atır. Müxtəlif sahələrdə həyata keçirilən islahatlar, Azərbaycanın təşəbbüsü ilə reallaşdırılan beynəlxalq əhəmiyyətli layihələr ölkəmizin daha da güclənməsinə, iqtisadi və siyasi mövqelərinin möhkəmlənməsinə mühüm töhfə verir.
Beyləqan Rayon İcra Hakimiyyətinin başçısı Əziz Əzizov Müzəffər Ali Baş Komandan İlham Əliyevin rəhbərliyi ilə 2020-ci ildə Vətən müharibəsində qazanılmış Qələbə və 2023-cü ildə keçirilmiş lokal xarakterli antiterror tədbirləri ilə ölkəmizin suverenliyinin tam bərpa edildiyini vurğulayıb. O qeyd edib ki, aparılan bərpa və quruculuq işləri ilə işğaldan azad olunmuş ərazilərimiz yenidən canlanır.
YAP İdarə Heyətinin üzvü, Milli Məclisin Gənclər və idman komitəsinin sədri Şahin İsmayılov vurğulayıb ki, partiyanın milli maraqlara əsaslanan siyasi mövqeyi ölkənin davamlı inkişafına və dövlətçilik ənənələrinin möhkəmləndirilməsinə xidmət edir. O həmçinin qeyd edib ki, YAP Beyləqan rayon təşkilatı hesabat dövründə fəallığı ilə seçilib, qarşıya qoyulan vəzifələrin icrasında partiya üzvlərinin birgə fəaliyyəti mühüm rol oynayıb.
Rayon Ağsaqqallar Şurasının sədri, partiya veteranı Etibar İmanov qeyd edib ki, Azərbaycan xalqı tarixi Zəfərlərin qürurunu və sevincini yaşayır. Bu möhtəşəm nailiyyətlərin əldə olunmasında Ulu Öndər Heydər Əliyevin əsasını qoyduğu və bu gün Prezident İlham Əliyevin rəhbərliyi ilə uğurla fəaliyyət göstərən Yeni Azərbaycan Partiyasının mühüm rolu var.
YAP Mərkəzi Aparatın məsul əməkdaşı Fəsli Nəbiyev Yeni Azərbaycan Partiyasının milli maraqlara əsaslanan siyasi xəttindən, dövlətçilik ənənələrinin qorunub möhkəmləndirilməsindəki mühüm rolundan danışıb. Qeyd olunub ki, partiya ötən illər ərzində cəmiyyətin böyük etimadını qazanıb və bu etimadı ardıcıl, məqsədyönlü fəaliyyəti ilə doğruldub.
Konfransda YAP Beyləqan rayon təşkilatının hesabat dövrü ərzindəki fəaliyyəti qənaətbəxş qiymətləndirilib və Yeni Azərbaycan Partiyasının VIII qurultayına nümayəndələr seçilib.
Sonda Yeni Azərbaycan Partiyasının Himni səsləndirilib.
