Azərbaycanın qazandığı hər bir uğur Ulu Öndər Heydər Əliyev siyasətinin təntənəsidir. Bu fikrin tarixi həqiqətə söykəndiyini görmək üçün Azərbaycanın müstəqilliyinin ilk illərində üz-üzə qaldığı ağır sınaqları xatırlamaq kifayətdir. Həmin dövrdə bədnam AXC-Müsavat cütlüyünün uğursuz siyasəti, şəxsi ambisiyaların dövlət və milli maraqlardan üstün tutulması Azərbaycanı ciddi təhlükələr və ağır faciələr qarşısında qoymuşdu. Tarixi nailiyyətimiz olan müstəqilliyimizi itirmək, Azərbaycanın bir dövlət kimi dünya xəritəsindən silinməsi təhlükəsi xalqın gələcəyə olan inamını ciddi şəkildə sarsıdırdı. Müstəqilliyin bərpasının ilk illərində xalqımız qarşılaşdığı çətin problemlərin həllini, xilaskarlıq missiyasını Ulu Öndər Heydər Əliyevdə görürdü. Heç də təsadüfi deyil ki, 1991-1993-cü illər ölkəmizin müasir tarixində hərc-mərclik, özbaşınalıq və qeyri-peşəkar idarəetmə dövrü kimi xatırlanır. Dövlətin suveren mövcudluğuna təhdid yaradan bütün amillər həmin dövrdə dövlətə səriştəsiz və qeyri-peşəkar şəxslərin rəhbərlik etməsinə görə baş verirdi. Belə bir vəziyyətdən çıxış yolunu axtaran Azərbaycan xalqı xilasını yalnız dahi rəhbər Heydər Əliyevin simasında görürdü. Dövlətçilik anlayışından bixəbər olan və hərbi birləşmələrdən öz məqsədləri üçün istifadə edən ayrı-ayrı şəxslərin hədələrindən qorxub gizlənmiş və bu təhlükəli proseslərin qarşısını ala bilmədiyini dərk edən hakimiyyəti zor gücünə zəbt etmiş AXC-Müsavat cütlüyü xilas üçün sonda Heydər Əliyevdən imdad istədi.

Dahi şəxsiyyət Heydər Əliyevin adı çəkilərkən ilk növbədə xilaskarlıq missiyasının yada düşməsi heç də təsadüfi deyil. Əslində, 1993-cü ildə Azərbaycanın ən ağır və mürəkkəb günlərində xalqın təkidli tələbi ilə hakimiyyətə qayıdan Ümummilli Lider Heydər Əliyev ölkəmizin bugünkü reallıqlarının əsasını qoydu. Azərbaycan tarixində və xalqımızın taleyində xüsusi əhəmiyyət daşıyan elə əlamətdar günlər vardır ki, onların tarixi mahiyyəti və gələcəyimiz baxımından rolu zaman keçdikcə daha aydın şəkildə dərk edilir. Məhz həmin günlərdə ölkənin gələcək inkişaf istiqamətini müəyyən edən yolun əsası qoyulur. Bu mənada həm Azərbaycanın, həm də xalqımızın həyatında mühüm dönüş nöqtəsi kimi qiymətləndirilən tarixi günlərdən biri də 1993-cü ilin 3 oktyabr tarixidir. Həmin gün xalqımız ölkənin gələcək taleyini həll edən, tərəqqi və inkişaf yolunun təməlini qoyan tarixi seçimə imza atdı. 1993-cü il oktyabrın 3-də keçirilmiş prezident seçkiləri Azərbaycan xalqının taleyində mühüm tarixi hadisə, müstəqil Azərbaycan dövlətinin inkişafa, tərəqqiyə gedən yolunda isə həlledici mərhələnin başlanğıcı oldu. Xalq böyük səs çoxluğu ilə öz seçimini etdi və Ulu Öndər Heydər Əliyevi müstəqil Azərbaycan Respublikasının Prezidenti seçdi. Bu tarixi seçimlə Azərbaycanın dövlətçilik tarixində yeni mərhələnin əsası qoyuldu, ölkənin gələcək inkişafının təməli formalaşdı.

Xalqın mütləq əksəriyyətinin etimadını qazanaraq Azərbaycan Respublikasının Prezidenti seçilən Ulu Öndər Heydər Əliyev 1993-cü il oktyabrın 10-da dövlətə və xalqa sədaqət andı içdi. Dahi liderin rəhbərliyi ilə Azərbaycan ağır siyasi və iqtisadi böhrandan çıxaraq sabitlik, iqtisadi inkişaf və tərəqqi yoluna qədəm qoydu. Ölkənin gələcək inkişafı üçün mühüm siyasi və iqtisadi qərarlar qəbul edildi, qlobal enerji və kommunikasiya layihələrinin reallaşdırılması istiqamətində mühüm addımlar atıldı. Bununla da Ulu Öndər Heydər Əliyev dövlətə və Vətənə sədaqətli xidmətin, milli maraqlara bağlılığın və dövlətçilik iradəsinin parlaq nümunəsini yaratdı.

Bu fikirləri Milli Məclisin deputatı Vüqar Rəhimzadə mediaya açıqlamasında bildirib.

Milli Məclisin deputatı qeyd edib ki, ilk hakimiyyəti dövründə  Azərbaycanı keçmiş SSRİ məkanında ən  geridə qalmış respublikadan çiçəklənən, inkişaf edən  diyara çevirən dahi şəxsiyyət  Heydər Əliyev 1993-cü ilin iyununda, yenicə müstəqilliyini bərpa etmiş Azərbaycanın gələcək taleyinin həll olunduğu ağır bir zamanda xalqın təkidli tələbinə səs verərək  hakimiyyətə qayıdaraq doğma Vətənin xilası naminə misilsiz fədakarlıq nümayiş etdirdi, ölkəmizi ictimai-siyasi pərakəndəliyin və anarxiyanın məngənəsindən qurtardı, bütün sahələrdə müşahidə olunan dərin tənəzzülün qarşısını aldı, yenidən qurduğu və hər cür qəsdlərdən qoruduğu dövlətin dayanıqlı inkişaf yolunu müəyyən etdi. Ümummilli Lider Heydər Əliyevin rəhbərliyi ilə Azərbaycan  böyük əziyyətlər bahasına öz müstəqilliyini əbədi və dönməz etdi. Müasir müstəqil Azərbaycanın sonrakı iqtisadi inkişafında Ümummilli Lider Heydər Əliyevin  hakimiyyətinin hər iki  mərhələsində yaratdığı möhkəm təməl həlledici rol oynadı. 

Dahi şəxsiyyətin  1993-cü ildə xalqın təkidli tələbi ilə hakimiyyətə qayıdışından sonra Azərbaycanın malik olduğu iqtisadi potensialdan səmərəli istifadənin təmin edilməsi məqsədilə “Əsrin müqaviləsi”nin imzalanması bu gün  ölkəmizin dünyada iqtisadi və siyasi mövqeyini daha da möhkəmləndirir. Ümummilli  Lider hələ o vaxtlar iqtisadiyyatın inkişafında neft amilinə böyük önəm verməklə bu gün  qeyri-neft sektorunun inkişafı istiqamətində davamlı addımların atılmasına geniş imkanlar yaratdı.  Ulu Öndərin Fərmanı əsasında 1999-cu ildə yaradılan Dövlət Neft Fondu bu gün müstəqil  Azərbaycan Respublikasında  neft gəlirlərindən səmərəli istifadəni, şəffaflığın qorunmasını təmin edir. Bütün dövrlərin təhlili Ulu Öndərin vaxtilə böyük uzaqgörənliklə bəyan etdiyi  bu reallığı təsdiqləyir ki, iqtisadiyyatı güclü olan dövlət hər şeyə qadirdir.

Vüqar Rəhimzadə bildirib ki, Ulu Öndərin tariximizin, milli-mənəvi dəyərlərimizin, ədəbiyyatımızın,  mədəniyyətimizin qorunması, təbliği istiqamətində gördüyü işlər ölçüyəgəlməzdir. Təbii ki, dahi rəhbərin bütün bu addımları dövlətinə, xalqına sevgisindən, Azərbaycanı hər zaman zirvələrdə görmək istəyindən irəli gəlirdi. Hər zaman dönə-dönə vurğulandığı kimi, Ümummilli Lider Heydər Əliyev artıq dillər əzbəri olan  “Mən həmişə fəxr etmişəm, bu gün də fəxr edirəm ki, mən azərbaycanlıyam!” çağırışı ilə harada yaşamasından asılı olmayaraq bütün dünya azərbaycanlılarını vahid  amal ətrafında sıx birləşdirdi.

Millət vəkili  vurğulayıb ki, uğurlarımız, Azərbaycanın bugünkü reallıqları Ümummilli Lider Heydər Əliyevin adı və titanik  fəaliyyəti  ilə bağlıdır. Dahi şəxsiyyət hakimiyyətinin birinci dövründə, həmçinin  fəaliyyətinin Naxçıvan mərhələsində Azərbaycanın bu günü, müstəqil gələcəyi naminə mühüm addımlar atıb. Bu gün hansı sahəyə nəzər salsaq Heydər Əliyev siyasətinin uğurlarını görərik. Son 23 ilə yaxın dövrdə bu xəttin Prezident İlham Əliyev tərəfindən uğurla davam etdirilməsi Azərbaycanın hərtərəfli inkişafını şərtləndirdi, ən əsası dahi şəxsiyyətin ən böyük arzusu olan torpaqlarımızın işğaldan azad edilməsini reallaşdırdı. Bu gün Ümummilli Liderin  şah əsəri olan müasir müstəqil Azərbaycanın uğurlarından bəhs edərkən Onun siyasi kursunun layiqli davamçısı Prezident, Müzəffər Ali Baş Komandan  İlham Əliyevin təkmil siyasəti nəticəsində bu təqdimata  əlavə edilən  qalib, bütövləşən, yeni dövrə qədəm qoyan  ölkə ifadəsini qürurla işlədirik. Hazırda işğaldan azad edilmiş bütün ərazilərimizdə Azərbaycan Bayrağının dalğalanması, Qarabağımızın, Şərqi Zəngəzurumuzun  diplomatik mərkəzə çevrilməsi hər birimiz üçün sonsuz  qürur, sevinc mənbəyidir. Bu gün artıq azad edilmiş torpaqlarımız cənnət məkana çevrilir. Bu torpaqların malik olduğu iqtisadi potensialdan səmərəli istifadə edərək  Azərbaycanın dayanıqlı inkişafına töhfələrin verilməsi üçün Dövlət proqramları, Milli Prioritetlər icra edilir. Azad edilmiş torpaqlarımız müasir şəkildə qurulur, mərhələ-mərhələ sakinlərinə qovuşur. Bu qürurverici məqamı da xüsusi qeyd etməliyik ki, artıq bir ilə yaxındır ki, sülh şəraitində yaşayırıq. Azərbaycan sülh gündəliyinin müəllifi, onu gercəkliyə çevirən ölkə kimi dünyanın diqqətindədir. 

Vüqar Rəhimzadə qeyd etdikləri fonunda bu ümumiləşdirməni aparıb ki, Ulu Öndər Heydər Əliyev təkcə qüdrətli Azərbaycan dövlətini yaratmaqla kifayətlənmədi, həmçinin bu dövlətin gələcək inkişaf konsepsiyasını müəyyənləşdirdi. İctimai sabitliyin davamlı prosesə çevrilməsi, onilliklər boyu xalqın sosial rifah halını təmin edən yeni neft strategiyasının hazırlanması və uğurlu icrası, qeyri-neft sektorunun inkişaf etdirilməsi və sair  kimi proseslər Ulu Öndərin dövlətçilik konsepsiyasının tərkib hissəsidir. Onun siyasi fəaliyyəti Azərbaycana xidmətin ən təkmil nümunəsidir. Bu siyasi xətti uğurla davam etdirən Prezident İlham Əliyevin rəhbərliyi ilə bu gün Azərbaycan zirvələri fəth edir, yeni zəfərlərə imza atır.