Hər bir xalqın tarixində onun kimliyini, milli mənsubiyyətini, müstəqillik arzusunu və dövlətçilik iradəsini özündə yaşadan müqəddəs rəmzlər vardır. Bu rəmzlərin ən ucası isə Dövlət Bayrağıdır. Çünki bayraq sadəcə rənglərdən və simvollardan ibarət parça deyil. O, xalqın keçmişini, bu gününü və gələcəyə olan inamını birləşdirən mənəvi dəyər, milli qürur və dövlət suverenliyinin təcəssümüdür. Azərbaycan xalqı üçün üçrəngli bayrağımız məhz belə müqəddəs məna daşıyır.
Azərbaycanın üçrəngli Dövlət Bayrağının tarixi 1918-ci il noyabrın 9-dan başlayır. Həmin gün Azərbaycan Xalq Cümhuriyyəti hökumətinin qərarı ilə mavi, qırmızı və yaşıl rənglərdən, ağ aypara və səkkizguşəli ulduzdan ibarət milli bayrağımız qəbul edildi. Bu hadisə Azərbaycan xalqının öz milli kimliyinə, azadlıq və müstəqillik ideallarına sahib çıxmasının mühüm tarixi təzahürü idi. Üçrəngli bayrağımız qısa müddət ərzində müstəqil dövlətçiliyimizin əsas rəmzinə çevrildi. Lakin 1920-ci ilin aprelində Xalq Cümhuriyyətinin süqutu ilə bu müqəddəs simvolun dövlət bayrağı kimi dalğalanmasına son qoyuldu.
Ancaq bir həqiqət dəyişmədi: bayrağı dirəklərdən endirmək mümkün olsa da, onun ifadə etdiyi azadlıq ruhunu xalqın yaddaşından silmək mümkün deyildi. Üçrəngli bayraq uzun illər xalqımızın qəlbində müstəqillik arzusunun, milli özünüdərkin və dövlətçilik düşüncəsinin rəmzi kimi yaşadı.
Bu tarixi irsin yenidən dövlət səviyyəsində bərpasında Ulu Öndər Heydər Əliyevin müstəsna xidmətləri oldu. 1990-cı il noyabrın 17-də onun təşəbbüsü və rəhbərliyi ilə Naxçıvan Muxtar Respublikası Ali Məclisinin sessiyasında üçrəngli bayrağımız Muxtar Respublikanın Dövlət Bayrağı kimi qəbul edildi. Eyni zamanda, onun Azərbaycan Respublikasının dövlət rəmzi kimi tanınması barədə müraciət qəbul olundu. 1991-ci il fevralın 5-də Azərbaycan Respublikasının Ali Soveti üçrəngli bayrağımızı yenidən Dövlət Bayrağı elan etdi. Beləliklə, xalqımızın azadlıq arzusu dövlətçilik tariximizdə öz layiqli yerini bərpa etdi.
Bayrağımızın hər bir rəngi dərin fəlsəfi məna daşıyır. Mavi rəng türk mənşəyimizi və milli kimliyimizi, qırmızı rəng müasir cəmiyyət qurmaq, inkişaf və demokratiya yolunda irəliləmək istəyimizi, yaşıl rəng isə İslam sivilizasiyasına mənsubiyyətimizi ifadə edir. Ağ aypara və səkkizguşəli ulduz isə bu bütöv mənzərənin ayrılmaz elementləridir. Üç rəng bir araya gələrək milli varlığımızın, mənəvi dəyərlərimizin və müasir dünyaya inteqrasiya istəyimizin vahid ifadəsinə çevrilir.
Bu gün Azərbaycan bayrağı yalnız dövlət müəssisələrinin, məktəblərin, meydanların və diplomatik nümayəndəliklərin üzərində dalğalanmır. O, xalqımızın qazandığı tarixi uğurların, beynəlxalq nüfuzunun, milli birliyinin və sarsılmaz iradəsinin canlı ifadəsidir. Prezident İlham Əliyevin təşəbbüsü ilə 2007-ci ildə Bakıda Dövlət Bayrağı Meydanının yaradılması, 2009-cu il noyabrın 17-də imzaladığı Sərəncamla isə 9 noyabrın Dövlət Bayrağı Günü təsis edilməsi bu müqəddəs rəmzə göstərilən dövlət ehtiramının bariz nümunəsidir.
Xüsusilə Vətən müharibəsində qazanılan tarixi Zəfər üçrəngli bayrağımızın mənasını daha da ucaltdı. Uzun illər işğal altında qalmış torpaqlarımızda Azərbaycan bayrağının yenidən dalğalanması xalqımızın ədalətə, tarixi həqiqətə və ərazi bütövlüyünə qovuşmasının rəmzinə çevrildi. Şuşada, Cəbrayılda, Füzulidə, Zəngilanda, Qubadlıda, Laçında və digər azad edilmiş ərazilərimizdə dalğalanan bayraq şəhidlərimizin qanı, qazilərimizin qəhrəmanlığı və Azərbaycan əsgərinin misilsiz şücaəti ilə qazanılmış qürur mənbəyidir.
Bu gün bayrağa hörmət etmək yalnız onu ucalıqda görmək və qarşısında ehtiramla dayanmaq deyil. Onun təmsil etdiyi dövlətə, xalqa, tarixə və milli dəyərlərə sədaqət göstərməkdir. Hər bir vətəndaş öz fəaliyyəti, davranışı, biliyi və zəhməti ilə ölkəsinin nüfuzunun yüksəlməsinə töhfə verməlidir. Çünki bayrağın ucalığı, eyni zamanda, onu təmsil edən xalqın birliyindən, vətənpərvərliyindən və məsuliyyətindən asılıdır. Gənc nəslə bu müqəddəs rəmzin tarixini öyrətmək, ona hörmət hissini aşılamaq isə gələcək dövlətçiliyimizin möhkəm təməllərindən biridir.
9 Noyabr – Dövlət Bayrağı Günü hər bir azərbaycanlıya öz tarixini xatırladan, milli qürurunu yeniləyən əlamətdar gündür. Bu tarix bizə bir daha göstərir ki, müstəqillik böyük mübarizələrlə qazanılır, dövlətçilik isə birlik, iradə və milli həmrəyliklə qorunur.
Üçrəngli bayrağımız daim yüksəklərdə dalğalansın! Onun kölgəsində yaşayan hər bir insan bu müqəddəs rəmzin daşıdığı azadlıq, birlik və dövlətçilik dəyərlərinə layiq olmağa çalışsın. Çünki bayraq bizim üçün sadəcə bir dövlət atributu deyil – o, Vətənimizin göylərə yazılmış adıdır!
Vüsalə Əliyeva,
YAP Sədərək rayon təşkilatının sədri
