Siyov Lerik rayonunun ucqar dağ kəndidir. Təbiətin buraya bəxş etdiyi saflıq insanların qanına da köçübdür. Burada torpağını sevmək, Vətənə məhəbbət göstərmək, halal, mehriban dolanmaq ululardan qalma ən müqəddəs adətdir. Bu diyarın Azərbaycanımızın bütövlüyü uğrunda canını fəda edən qəhrəman oğulları çoxdur. Kəndin ən səfalı guşəsində Birinci Qarabağ və Vətən müharibəsində şəhidlik zirvəsinə ucalmış qəhrəmanların şərəfinə “Şəhidlər ölməz” abidə kompleksi inşa edilibdir.
Siyovluların müqəddəs and yerinə döyən “Şəhidlər ölməz” abidə kompleksinin açılış mərasimi keçirildi. Dövlət Himninin oxunması ilə açıq elan edilən tədbirdə Azərbaycan Respublikasının müstəqilliyi, ərazi bütövlüyü uğrunda döyüşlərdə həlak olmuş şəhidlərin əziz xatirəsi bir dəqiqəlik sükutla yad edildi. Abidə kompleksinin üzərindən örtük Lerik Rayon İcra Hakimiyyətinin başçısı Əkbər Abbasov və şəhid valideynlərlə birgə götürüldü, önünə tər-təzə gül-çiçək dəstələri düzüldü.
Rayon icra hakimiyyətinin başçısı Əkbər Abbasov şəhid ailələrini, kənd sakinlərini salamlayıb dedi:- Əvvəla möhtəşəm abidə kompleksinin tikintisində dəstək göstərən hər kəsə minnətdarlığımı bildirirəm. Azərbaycanımızın əbədi, əzəli torpaqlarının azadlığı uğrunda şəhid olmuş Vətən övladlarının xatirəsi daim əziz tutulur, onların adının əbədi qalması üçün dövlət tərəfindən müxtəlif tədbirlər həyata keçirilir, şəhid ailələri hər zaman diqqət mərkəzində saxlanılır. Həmçinin bu istiqamətdə xalqımızın mərd övladları, ictimaiyyət nümayəndələri, eləcə sahibkarlar müəyyən işlər görürlər. Bu istiqamətdə respublikada olduğu kimi, qartalı dağlardan vüqar, qürur alan Lerikdə də müxtəlif işlər icra edilibdir. Dediyim tədbirlər silsiləsindən olmaqla sizin kəndinizdə ictimaiyyət nümayəndələrinin maliyyə dəstəyi, ərazidən olan sahibkarların, həm rayon icra hakimiyyətinin təşkilatçılığı sayəsində Vətən şəhidlərin adına belə abidə kompleksi ucaldılıb. Bəli, şəhidlər ölməz, Vətən bölünməz...
Siyov kəndinin ağsaqqalı Ə. Zeynalov, ehtiyatda olan polkovnik H. Ağayev, Vətən müharibəsi şəhidi Vidadi Cabbarovun atası Cəbrayıl Cabbarov çıxış edib ölkəmizin ərazi bütövlüyü uğrunda gedən döyüşlərdə şəhid olmuş qəhrəman Vətən övladlarının xatirəsinə həmişə ehtiram göstərdiyini , xalqımızın şəhidlər ilə qürur duyduğunu dedilər. Şəhid qardaşı Bəxtiyar Bayramov isə çıxışında şəhid ailələrinə ölkədə yüksək səviyyəli qayğıya görə dövlət başçısı İlham Əliyevə və Birinci vitse-prezident Mehriban xanım Əliyevaya minnətdarlığını ifadə etdi.
Çıxışlar bitdi, söz Mehman Qafarov adına Siyov kənd tam orta məktəbinin şagirdlərinə verildi. Onların Vətən və şəhidlərlə bağlı hazırladığı kompozisiya sözün əsl mənasında ürəkləri qürurla doldurdu.
Zəfər Əliyev,
Azərbaycan Jurnalistlər Birliyinin üzvü
